كوكشەتاۋلىق بالا كەزدە تاۋىپ العان مامونتتىڭ سۇيەگىن مۇراجايعا تاپسىردى
كوكشەتاۋ قالاسىنىڭ 25 جاستاعى تۇرعىنى دۋلات مۇستافين مامونتتىڭ جامباس سۇيەگى مەن اتلانت - ءبىرىنشى ومىرتقاسىنىڭ بولشەگىن مۇرجايعا تاپسىردى.
دۋلات مۇستافيننىڭ ايتۋىنشا، كونە جانۋاردىڭ سۇيەگى ونىڭ ۇيىندە ۇزاق جىلدار ساقتالعان. سۇيەكتى بالا كەزىندە عابيت مۇسىرەپوۆ اۋدانىنداعى سالقىنكول اۋىلىنا تۋىستارىنا بارعانىندا تاۋىپ العان. اققانبۇرلىق وزەنىنە سۋعا شومىلىپ، جۇرگەندە جاردان سۇيەكتەردىڭ شىعىپ تۇرعانىن كورگەن.
«ءبىز بالالار سۇيەكتى قازىپ الىپ، ونى ەستەلىك رەتىندە ءبولىپ الدىق. ءبىرى ءتىسىن، ءبىرى ءمۇيىزىن السا، مەن ەكى سۇيەگىن الدىم. كەيىن مۇراجايعا اپارىپ تاپسىرعىم كەلدى. الايدا، ول كەزدە جاس بولعاندىقتان دوستارىما كورسەتىپ سوعان ماقتانىپ ءجۇردىم. سۇيەكتىڭ مامونتىكى ەكەنىنە ەشكىم سەنبەدى. مۇرجاعاي تاپسىرۋعا ۋاقىتىم دا بولمادى. ءبىراز جىل وتكەن سوڭ، جولداسىم سۇيەكتەردى لاقتىرىپ جىبەرۋدى ۇسىندى. سول كەزدە عانا بارىپ، مۇراجاي تاپسىردىم. شىنىمدى ايتسام، سۇيەكتەردىڭ قۇندى ەكەنىن بىلمەدىم»، دەپ ايتتى د. مۇستافين قازاقپارات تىلشىسىنە.
مۇراجاي قىزمەتكەرلەرىنىڭ ايتۋىنشا، مامونتتار وسىدان 15 مىڭ جىل بۇرىن ءومىر سۇرگەن. بۇلار سول كەزدە قازاقستان اۋماعىندا مەكەندەگەن ءپىلتۇمسىقتىلار قاتارىنداعى سوڭعى جانۋارلار. وسى كۇنى مامونت سۇيەكتەرىنىڭ قالدىقتارى اقمولا وبلىسىنىڭ اۋماعى مەن استانا قالاسىنىڭ ماڭىندا تابىلىپ وتىر.
بۇعان دەيىن جاقسى جانە شورتاندى اۋداندارىنىڭ اۋماعىنان دا مامونتتاردىڭ قاڭقاسى تابىلدى. ءبىراق ول سۇيەكتەر دۇرىس ساقتالماعان. ال مىنا سۇيەك جاقسى ساقتالعان.
«سۇيەككە قاراپ، بۇل ەرەسەك مامونتتىكى ەكەنىن اڭعارۋعا بولادى. دۋلات بىزگە سۇيەك تابىلعان جەردى كورسەتەتىنى تۋرالى ۋادە بەردى. استانا عالىمدارىمەن حابارلاسىپ، الداعى جىلدىڭ جازىندا سول جەردە قازبا جۇمىستارىن جۇرگىزۋدى جوسپارلاپ وتىرىمىز»، - دەيدى اقمولا وبلىستىق ولكەتانۋ مۇراجايىنىڭ ديرەكتورى قۋانىش شاقشاقوۆ.