ەلىمىزگە سىرتتان كەلەتىن بالالار ويىنشىقتارىنىڭ قاۋىپتىلىگى انىقتالۋىنا بايلانىستى كولەمى ازايتىلدى

استانا. قازاقپارات - سىرتتان كەلەتىن بالالار ويىنشىقتارىنىڭ ساپاسىز جانە قاۋىپتىلىگىنىڭ انىقتالۋىنا بايلانىستى، ونى جەتكىزۋ كولەمى ازايتىلدى.

بۇل تۋرالى ەلىمىزدىڭ باس مەملەكەتتىك سانيتارلىق دارىگەرى جانداربەك بەكشين ءمالىم ەتتى، دەپ حابارلايدى قازاقپارات ءتىلشىسى.

«ەلىمىزگە كەلەتىن قاۋىپتى جانە ساپاسىز دەپ تانىلعان بالالار ويىنشىقتار سانى %16,2 ارتقان. وسى جاعدايدان سوڭ ءبىز باقىلاۋدى قاتاڭ قولعا الدىق. بۇگىندە سىرتتان كەلەتىن ساپاسىز جانە قاۋىپتى دەپ تانىلعان ويىنشىقتاردىڭ ۇلەسى %47 دان %8 عا تومەندەتىلدى. بۇل دەگەنىمىز شەتەلدەن كەلەتىن ويىنشىقتار كولەمىنىڭ ازايعانىن كورسەتەدى. جالپى ەلىمىزدەگى بالالار ويىنشىقتارىنىڭ %99 شەتەلدەن اكەلىنەدى، ونىڭ كوبىسى قىتاي، تۇركيا، ۋكراينا، بەلورۋس ەلدەرىنەن، قالعان %1 وزىمىزدەن شىعادى»، - دەدى ج. بەكشين و ك ق- دە وتكەن باسپا ءسوز ءماسليحاتىندا.

ودان بولەك، باس سانيتاردىڭ ايتۋىنشا تۇرمىستىق حيميا تاۋارلارى، بالالار مەن جاسوسپىرىمدەرگە ارنالعان ونىمدەر، جيھاز، كوسمەتيكا جانە تەمەكى ونىمدەرىنە تەكسەرۋ جۇمىستارى جۇرگىزىلدى. تەكسەرۋ ناتيجەسىندە تۇتىنۋ تالاپتارىنا سايكەس كەلمەيتىن تاۋارلاردىڭ ۇلەسى %21,4 قۇراعان. ول بويىنشا 677 ءىس قوزعالىپ، 151 سوت ۇكىمى شىعارىلدى، ودان بولەك، 19,6 توننادان استام ءونىم ساتۋدان الىنىپ تاستالدى. جانە دە جالپى سوماسى 56 ميلليون تەڭگەدەن استام ايىپپۇل سالىندى، بۇل وتكەن جىلمەن سالىستىرعاندا ەكى ەسە ارتىق (2017 -جىلى 24,6 ميلليون تەڭگە).

«جالپى جۇرگىزىلىپ جاتقان جۇمىستاردىڭ ناتيجەسىندە تۇتىنۋعا سايكەس كەلمەيتىن تاۋار مولشەرىنىڭ سەرپىندى تومەندەۋى بايقالادى. وعان دالەل سوڭعى ءۇش جىلدا ساپاسىز دەپ تانىلعان تاۋارلاردىڭ ۇلەسى %30- دان %13,4 عا تومەندەدى»، - دەدى ول.

بۇعان دەيىن باس سانيتارلىق دارىگەر ەلىمىزدە مەنينگوكوكك ينفەكسياسىنىڭ تۇراقتى ەكەنىن ايتقان بولاتىن.