استاناعا گاز تارتۋدىڭ ءبىرىنشى كەزەڭى باستالدى

 استانا. قازاقپارات - بۇگىن يندۋستريالاندىرۋدىڭ ەكىنشى بەسجىلدىعى اياسىنداعى جالپى ۇلتتىق تەلەكوپىر بارىسىندا ەلباسى نۇرسۇلتان نازاربايەۆ «سارىارقا» گاز قۇبىرىنىڭ قۇرىلىسىن باستاۋعا رۇقسات بەردى، دەپ حابارلايدى قازاقپارات ءتىلشىسى.

«ءسىز جاريالاعان بەس الەۋمەتتىك باستامانىڭ ءبىرى ەلدىڭ ورتالىق جانە سولتۇستىك بولىكتەرىن گازداندىرۋعا ارنالعان. «سارىارقا» ماگيسترالدىق گاز قۇبىرى « قىزىلوردا- جەزقازعان- قاراعاندى- تەمىرتاۋ- استانا» باعدارى بويىنشا وتەدى. ونىڭ جالپى ۇزىندىعى  1061 شاقىرىمعا تارتىلادى جانە ءبىر جىلداعى گاز وتكىزۋ مۇمكىندىگى 2,2 ميلليارد تەكشە مەترگە جەتەدى. اتالعان جوبانى ىسكە اسىرۋ 2 ميلليون 700 مىڭ قازاقستاندىقتى گازبەن قامتاماسىز ەتۋگە جول اشادى. پرەزيدەنت مىرزا، «سارىارقا» جوباسىنىڭ 1- كەزەڭىن جۇزەگە اسىرۋ ءۇشىن ارنايى كاپسۋلانى ورناتۋعا رۇقسات بەرىڭىز» ، - دەدى «استاناگاز ق م گ» باس ديرەكتورى ساعيدوللا ماقاشيەۆ.

بۇدان بۇرىن حابارلانعانداي، «سارىارقا» ماگيسترالدى گاز قۇبىرىنىڭ « قىزىلوردا- جەزقازعان- قاراعاندى- تەمىرتاۋ- استانا» باعىتى بويىنشا ءبىرىنشى كەزەڭى 2019 -جىلدىڭ جەلتوقسان ايىنا دەيىن اياقتالادى. ءبىرىنشى كەزەڭنىڭ بولجامدى قۇنى 267 ميلليارد تەڭگەدەن اسادى. قاراعاندى، اقمولا وبلىستارى مەن استانا قالاسىنىڭ اكىمدىكتەرى ماگيسترالدى گاز قۇبىرى مەن ايماقتىق جەلىلەر قۇرىلىسىنىڭ مەرزىمىن ەسكەرە وتىرىپ، ينفراقۇرىلىم قۇرىلىسى ءۇشىن جول كارتاسىن ازىرلەگەن.