قازاقستان ءىرى كولەمدە تۇيە جانە بيە ءسۇتىن ەكسپورتقا شىعارۋدا

 استانا. قازاقپارات - بۇگىن ەلباسىنىڭ قاتىسۋىمەن ءوتىپ جاتقان يندۋستريالاندىرۋدىڭ ەكىنشى بەسجىلدىعى اياسىنداعى جالپى ۇلتتىق تەلەكوپىر بارىسىندا تۇيە جانە بيە ءسۇتىن ەكسپورتقا شىعارۋعا رۇقسات بەرىلدى، دەپ حابارلايدى قازاقپارات ءتىلشىسى.

«قۇرمەتتى ەلباسى! ءبىزدىڭ كاسىپورىن تۇيە جانە بيە ءسۇتىن ۇنتاق كۇيىندە وندىرەتىن قازاقستانداعى جالعىز جوبا. ءونىمنىڭ 90 پايىزى شەتەلگە ەكسپورتتالاتىن بولادى. جوبا تۇركىستان،  قىزىلوردا، جامبىل وبلىستارىندا مال باسىن كوبەيتىپ، تۇيە شارۋاشىلىعىنىڭ دامۋىنا سەپتىگىن تيگىزەدى. ءبىزدىڭ جوبا - قازاقستان مەن قىتاي اراسىنداعى ءوزارا ءتيىمدى سەرىكتەستىكتىڭ دالەلى. قادىرلى ەلباسى، ينۆەستورلارعا كورسەتكەن قولداۋىڭىز ءۇشىن سىزگە العىس ءبىلدىرىپ، زاۋىتىمىزدىڭ ەكسپورتتىق ونىمدەرىن جونەلتۋگە رۇقسات بەرىڭىز!» ، - دەدى «Golden Camel Group LTD» ج ش س زاۋىتىنىڭ ديرەكتورى يانگ دجي.

سونىمەن قاتار، تەلەكوپىر بارىسىندا «ماريەۆەن فۋد تيان- شان» ج ش س ديرەكتورى الەكساندر ۆيازنيكوۆ ىسكە اسىرىلعان زاۋىتتى تانىستىردى.

«ءبىزدىڭ جوبا ترانسۇلتتىق Mareven Food Holdings تاراپىنان جۇزەگە اسىرىلۋدا. ونىڭ اكسيونەرلەرى 70 تەن استام ەلدە تابىستى جۇمىس ىستەپ جاتىر. ۇن ءوندىرۋ مەن ازىق- تۇلىك ونىمدەرىنە نەگىزدەلگەن زاۋىت قىسقا مەرزىمدە سالىندى. زاۋىتتا 500 دەن استام ادام جۇمىسپەن قامتىلدى. بىزدەگى ءونىمنىڭ 80 پايىزى قىتايعا، يرانعا، اۋعانستانعا جانە ورتالىق ازيا ەلدەرىنە ەكسپورتتالادى» ، - دەدى الەكساندر ۆيازنيكوۆ.