نۇرسۇلتان نازاربايەۆ ءبىرقاتار نىساندى ىسكە قوسادى

 استانا. قازاقپارات - استانادا جالپى ۇلتتىق تەلەكوپىر باستالدى. اتالمىش شاراعا ەلباسى نۇرسۇلتان نازاربايەۆ قاتىسۋدا.

«يندۋستريالاندىرۋدىڭ ەكىنشى بەسجىلدىعى: قازاقستاندا جاسالعان» اتاۋىمەن وتۋدە، دەپ حابارلايدى قازاقپارات ءتىلشىسى.

ايتا كەتەيىك، يندۋستريالاندىرۋدىڭ ەكىنشى بەسجىلدىعىنىڭ ءتورتىنشى جىلى اياقتالۋعا جاقىن. بيىل جالپى قۇنى 1,2 تريلليون تەڭگە بولاتىن جۇزدەن استام نىسان ىسكە قوسىلىپ، 13 مىڭ جۇمىس ورنى اشىلدى. ەلىمىزدەگى يندۋستريالدى سەرپىننىڭ ارقاسىندا حالىقتىڭ ءومىر ءسۇرۋ ساپاسى ارتتى. جاڭا جۇمىس ورىندارى، زاماناۋي ينفراقۇرىلىم، تسيفرلىق قىزمەتتەر مەن سەرۆيستەر اشىلدى.

قازىرگى ۋاقىتتا استانامەن بۇگىن ىسكە قوسىلاتىن بارلىق يندۋستريالىق جوبالاردىڭ 7 مىڭ جۇمىسشىسى تىكەلەي بايلانىسقا شىققان. جالپى بۇگىنگى تەلەكوپىرگە ەلىمىزدىڭ بارلىق اۋماعىنان 28 كاسىپورىن قوسىلادى دەپ كۇتىلۋدە.

بۇدان باسقا، ق ر پرەزيدەنتىنىڭ «التىن ساپا» سىيلىعىنىڭ، «قازاقستاننىڭ ۇزدىك تاۋارلارى» رەسپۋبليكالىق كورمە- كونكۋرسىنىڭ، «پارىز-2018» بيزنەستىڭ الەۋمەتتىك جاۋاپكەرشىلىگى كونكۋرسىنىڭ لاۋرەاتتارىن سالتاناتتى ماراپاتتاۋ شاراسى دا وتەدى.

شاراعا مەملەكەتتىك ورگاندار، ۇلتتىق كومپانيالاردىڭ باسشىلارى، اكىمدەر، ق ر پارلامەنت دەپۋتاتتارى، «اتامەكەن» ق ر ۇ ك پ وكىلدەرى، ساياسي پارتيالاردىڭ جەتەكشىلەرى، قوعامدىق بىرلەستىك وكىلدەرى، ءىرى ونەركاسىپ كاسىپورىندارىنىڭ باسشىلارى، وتكەن جىلعى كونكۋرستاردىڭ لاۋرەاتتارى، 2018 -جىلعى سىيلىقتاردىڭ نومينانتتارى مەن لاۋرەاتتارى قاتىسۋدا.