قازاقستاننان مۇناي ونىمدەرىن شىعارۋعا تىيىم سالامىز - قانات بوزىمبايەۆ
دەپ حابارلايدى قازاقپارات ءتىلشىسى.
ق ر ەنەرگەتيكا ءمينيسترى قانات بوزىمبايەۆتىڭ ايتۋىنشا، بۇگىندە اي-92 ماركالى بەنزيننىڭ ورتاشا باعاسى 154,8 تەڭگەنى قۇرايدى. ال، رەسەيدە اتالعان ءونىم - 230,5 تەڭگە، وزبەكستاندا - 273 تەڭگە، قىرعىزستاندا 234 تەڭگە تۇرادى. سول سياقتى بىزدە ديزەلدى وتىننىڭ ءبىر ليترى ورتا ەسەپپەن 193,2 تەڭگەنى قۇراسا، وزبەكستاندا 208 تەڭگە، رەسەيدە - 246,5 تەڭگە، قىرعىزستاندا - 250,8 تەڭگەگە دەيىن بارادى.
«قازاقستاندا جانارماي باعاسىن كوتەرمەۋ ءۇشىن، سونداي- اق ديزەل وتىنى تاپشىلىعى قاۋپىن ازايتۋ ماقساتىندا مينيسترلىكپەن ەۋرازيالىق ەكونوميكالىق وداعىنىڭ نورمالارىنا قايشى كەلمەيتىن قولدانىستاعى زاڭناما نەگىزىندە قازاقستان رەسپۋبليكاسىنىڭ شەكاراسىنان تىس جەرلەرگە مۇناي ونىمدەرىن شىعارۋعا ۋاقىتشا تىيىم سالۋ ءۇشىن شارالار ازىرلەنۋدە»، - دەدى ق. بوزىمبايەۆ.
ءمينيستردىڭ سوزىنە قاراعاندا، قازىرگى كەزدە وتاندىق نارىقتا مۇناي ونىمدەرى بويىنشا جاعداي تۇراقتى. جانار- جاعارمايدىڭ تاپشىلىعى جوق.
«10 - جەلتوقسانداعى جاعداي بويىنشا اي-92 ماركالى بەنزيننىڭ ورتاشا باعاسى ليترى ءۇشىن 154,8 تەڭگە، ال ديزەل وتىنى ليترى ءۇشىن 193,2 تەڭگەنى قۇرايدى. سونىمەن قاتار، ەلىمىزدەگى مۇناي بازالارىندا جانار- جاعارمايدىڭ قورى ىشكى نارىقتىڭ قاجەتتىلىگىنە جەتكىلىكتى. اي-92 بەنزينى بويىنشا - 267,5 مىڭ توننا (30 كۇنگە) جانە ديزەل وتىنى - 143,2 مىڭ توننا (11 كۇنگە)»، - دەپ اتاپ كورسەتتى ق. بوزىمبايەۆ.
اۆتور: ارمان اسقاروۆ