قىتاي ينتەرنەت ساۋدانى جانداندىرۋ ءۇشىن كەدەندىك باج سالىعىن تومەندەتپەك
رەسمي وكىل گاو فەن كەلەر جىلى قىتاي ۇكىمەتى ەكسپورت پەن يمپورتتى ودان ءارى ارتتىرۋ ءۇشىن قۇرىلىمدىق رەفورمانى جالعاستىرا بەرەتىنىن ايتتى. شىعىس كورشىمىز جاڭا جىلدان باستاپ ينتەرنەت ساۋدانى جانداندىرۋ ءۇشىن كەدەندىك باج سالىعىن تومەندەتۋدى جوسپارلاپ وتىر.
وسىلايشا دۇنيەجۇزىمەن ساۋدا- ساتتىقتى ەسەلەي بەرمەك. بيىل 11 ايدا قىتايدىڭ سىرتقى ساۋداسى 11,1 پروتسەنتكە ارتىپ، 4 تريلليون دوللارعا جۋىقتادى. كەدەندىك باس باسقارماسىنىڭ مالىمەتى بويىنشا، ەكسپورت پەن يمپورت كولەمى بىرتىندەپ تەڭەسىپ كەلەدى. بۇل حابارلاما قىتاي الەمگە تەك ءوز تاۋارلارىن جىبەرۋشى عانا ەمەس، كوپتەپ يمپورتتاۋشى ەل دەگەندى مەڭزەيدى.
ستاتيستيكاعا سەنسەك، قاڭتار- قاراشا ايلارىندا قىتايدىڭ سىرتتان تاۋار كىرگىزۋى 14,6 پروتسەنتكە ارتقان.
لي كۋيۆەن، ق ك ب ب ستاتيستيكا ءبولىمىنىڭ باسشىسى:
- جىل باسىنان بەرى ءبىزدىڭ ەلىمىز يمپورتتى ارتتىرىپ، الەمگە قىتاي نارىعىن كەڭىنەن اشتى. سونىڭ ەسەبىنەن شەتتەن كەلەتىن تاۋار كولەمى ارتىپ وتىر. سونىمەن، بيىل 11 ايدا قىتايعا شەتتەن كەلەتىن شيكىزات پەن تۇرمىستىق تاۋارلاردىڭ كولەمى ارتقان. سونىڭ ىشىندە «ءبىر بەلدەۋ، ءبىر جول» بويىنداعى مەملەكەتتەرمەن ساۋدا- ساتتىق 3,3 پروتسەنتكە ءوستى.
ال قىتايدىڭ ەۋروپالىق وداقپەن ساۋداسى 8,7 پروتسەنتكە ارتىپتى. ءوزارا كەلىسپەۋشىلىك پەن تاريفتىك تەكەتىرەسكە قاراماستان، ا ق ش- پەن ساۋدا- ساتتىق 7,2 پروتسەنتكە كوبەيگەن. شىعىستاعى ۇلكەن كورشىمىز بۇل كورسەتكىشتەردى ودان ءارى ارتتىرا تۇسپەك نيەتتە.
2019 -جىلدان باستاپ ينتەرنەت- ساۋدا ءۇشىن كەدەندىك باج سالىعى تومەندەيدى. تاياۋدا قابىلدانعان ترانسشەكارالىق ەلەكتروندى ساۋدانى دامىتۋ جونىندەگى زاڭ بويىنشا يمپورت سالىعى ازايدى. ۇكىمەت ترانسشەكارالىق ونلاين ساۋدانى جانداندىرۋ ءۇشىن ءوز ازاماتتارىنا بولىنەتىن كۆوتانى 6 مىڭ يۋانعا ارتتىرىپ، ەندى ول 26 مىڭ يۋاندى قۇراپ وتىر. بۇل - شامامەن 1 ميلليون 400 مىڭ تەڭگە.
«الي- ريسەرچ» زەرتتەۋ ورتالىعىنىڭ مالىمەتى بويىنشا، وتكەن جىلى قىتايلىق ينتەرنەت پايدالانۋشىلاردىڭ 10 پروتسەنتى شەتتەن زات ساتىپ العان. ال 2014 -جىلى بۇل كورسەتكىش 1,6 پروتسەنت قانا بولعان. 63 ءتۇرلى يمپورتتىق تاۋارعا باج سالىعىنىڭ ازايتىلۋى ونلاين- ساۋدانى ودان ءارى جانداندىرا تۇسپەك.
اۆتورى: نۇربەك بەكەن
www.24.kz