قازاقستان چەحيادان اسىل تۇقىمدى مال تاسىمالداماق

استانا. قازاقپارات - قازاقستان چەحيادان ەتتى جانە ءسۇتتى اسىل تۇقىمدى ءىرى قارا تاسىمالداۋعا مۇمكىندىك بەرەتىن ءبىرقاتار كەلىسىمدەرگە قول قويدى، دەپ حابارلايدى «قازاقپارات» ح ا ا.

چەحيانىڭ استاناداعى ەلشىلىگىنىڭ وكىلدەرى اڭگىمە مالدىڭ Simmental, Angus جانە Holstein سياقتى تۇرلەرىن جەتكىزۋگە قاتىستى بولىپ وتىرعاندىعىن ايتادى.

قازاقستاندىق مال شارۋاشىلىعى ماماندارى ەكى ەل اراسىنداعى ساۋدا-ەكونوميكالىق قاتىناستاردى دامىتۋ جوباسى اياسىندا چەحيا رەسپۋبليكاسىنا باردى. دەلەگاتسيا وكىلدەرى ءمۇيىزدى ءىرى قارانى ەكسپورتتاۋمەن اينالىساتىن 5 كومپانيا وكىلدەرىمەن كەزدەسىپ، چەحيانىڭ اۋىل شارۋاشىلىعى مينيسترلىگى مەن وسى ەلدىڭ ەكسپورت بانكىندە بولدى. سونداي-اق ولار مالشىلار وداعىنا بارىپ، 6 ءىرى فەرما مەن 2 تۇقىم ستانتسياسىنىڭ جۇمىسىمەن تانىستى.

وسى ساپار بارىسىندا قازاقستانعا ەتتى جانە ءسۇتتى مال جەتكىزۋدى كوزدەيتىن ءبىرقاتار كەلىسىمدەرگە قول قويىلدى.

چەحيا فەرمالارى مەن عىلىمي-زەرتتەۋ ينستيتۋتتارى قازاقستانمەن ىنتىماقتاستىقتا ەڭبەك ەتۋگە مۇددەلى. بۇل باعىتتا ولار تەك قازاقستانعا ءمۇيىزدى ءىرى قارانى جەتكىزۋگە عانا ەمەس، قازاقستاندىق تۇقىمدارعا دا قىزىعۋشىلىق تانىتىپ وتىر.

مالدى اسىلداندىرۋ ەلدە ءمۇيىزدى ءىرى قارانىڭ ساپاسى مەن ەكونوميكالىق تيىمدىلىگىن دامىتۋدىڭ ماڭىزدى قۇرالدارىنىڭ ءبىرى سانالادى.

چەحيادا بۇل جۇيە وسىدان 50 جىل بۇرىن ەنگىزىلگەن جانە وسى سالادا ايتارلىقتاي جەتىستىكتەرگە قول جەتكىزىلگەن. مىسالى چەحياداعى سيىردان ساۋىلعان ءسۇت دەڭگەيى ە و كولەمىندەگى ۇزدىك كورسەتكىشتەردىڭ بىرىنە يە.