استانادا «ەلوردا جۇلدىزى» سىيلىعىنىڭ يەگەرلەرى ماراپاتتالدى
ايتا كەتسەك، 1997 -جىلى 10 - جەلتوقساندا ق ر پرەزيدەنتى نۇرسۇلتان نازاربايەۆتىڭ جارلىعىمەن ەلوردا الماتى قالاسىنان اقمولا قالاسىنا رەسمي تۇردە كوشىرىلدى.
وسى اتاۋلى كۇنگە وراي، بيىل «ەلوردا جۇلدىزى» سىيلىعى العاش رەت ۇيىمداستىرىلدى. بۇگىن ەلىمىزدىڭ باس قالاسىنىڭ دامۋىنا زور ۇلەس قوسقان ەلوردالىق ۇجىمدار مەن ۇيىمدار اتالعان سىيلىقپەن ماراپاتتالدى. ەندى بۇل سىيلىق ءداستۇرلى تۇردە تابىستالىپ تۇرماق.
شارانىڭ شىمىلدىعى «Astana BALLET» تەاترىنىڭ حورەوگرافيالىق قويىلىمىمەن اشىلدى. 20 جىلدىڭ قورىتىندىسى بويىنشا ءبىرىنشى ماراپات وسى ۇجىمعا تابىستالدى. 2012 -جىلى ەلباسىنىڭ باستاماسىمەن نەگىزى قالانعان تەاتر ساحناسىندا ءتورت جىلدىڭ ىشىندە 10 بالەت قويىلىمى مەن 4 كونسەرتتىك باعدارلاما قويىلدى.
ودان ءارى كەشتى ءانشى دينايا مەن «استانا وپەرا» ۇجىمى جالعاستىردى.
«استانا وپەرا» مەملەكەتتىك وپەرا جانە بالەت تەاترى دا «ەلوردا جۇلدىزى» سىيلىعىنىڭ لاۋرەاتى اتاندى. قازىرگى تاڭدا تەاتر ەلىمىزدەن تىس جەرلەردە دە كەڭىنەن تانىمال. ونىڭ ءاربىر پرەمەراسى انشلاگپەن وتەدى.
«ەكسپو-2017» مامانداندىرىلعان حالىقارالىق كورمەسى دە سىيلىق يەگەرى اتاندى. بىلتىر جازدا وتكەن كورمەگە 100 دەن اسا مەملەكەت قاتىستى. 3 ايدىڭ ىشىندە كورمەنى 178 ەلدەن 4 ميلليوننان اسا تۋريست تاماشالاعان، ونىڭ ىشىندە 20 مەملەكەت جانە ۇكىمەت باسشىسى بار. «استانا ەكسپو-2017» ۇك باسشىلىعىنا «ەلوردا جۇلدىزىن» استانا اكىمى باقىت سۇلتانوۆ تابىستادى.
«بارشاڭىزدى بۇگىنگى ەرەكشە تاريحي كۇنمەن شىن جۇرەكتەن قۇتتىقتايمىن. استانانىڭ 20 جىلدىعىن تويلاۋدىڭ العاشقى شاراسى ءبىر جىل بۇرىن وسى جەردەن باستاۋ العان، بۇگىن مىنە سونىڭ قورىتىندىسىن جاساۋدامىز. ەلباسىنىڭ 21 جىل بۇرىن قابىلداعان تاريحي شەشىمى، قازىردە ءوزىنىڭ تاريحي ماڭىزدىلىعىن كورسەتتى. وعان دالەل شاعىن عانا وبلىس ورتالىعىنىڭ الەم تانىعان اسەم قالا - استاناعا اينالۋى» ، - دەدى استانا قالاسىنىڭ اكىمى باقىت سۇلتانوۆ.
جوعارى ءبىلىم بەرۋ سالاسى بويىنشا اتاۋلى سىيلىق تەك استانانىڭ عانا ەمەس، تۇتاستاي قازاقستاننىڭ ۇلتتىق برەندىنە اينالعان نازاربايەۆ ۋنيۆەرسيتەتىنە تابىس ەتىلدى. 2010 -جىلى ستۋدەنتتەرگە ەسىگىن ايقارا اشقان ءبىلىم ورداسى بۇگىندە وزىندىك عىلىمي بازاسى بار ەلىمىزدىڭ جەتەكشى جوعارى وقۋ ورىندارىنىڭ ءبىرى. «ەلوردا جۇلدىزى» سىيلىعىن ۋنيۆەرسيتەت باسشىلىعىنا ق ر ءبىلىم جانە عىلىم ءمينيسترى ەرلان ساعاديەۆ تابىستادى.
مەديتسينا سالاسى دا نازاردان تىس قالعان جوق. زاماناۋي مەديتسينالىق كومەك الۋ ءۇشىن وڭىرلەردەن ەلورداعا ەمدەلۋگە كەلەتىن پاتسيەنتتەر ۇلەسى وتكەن جىلى %60 عا جۋىقتى قۇرادى، ودان بولەك، بۇگىندە باس قالادا 20 مىڭعا جۋىق كۇردەلى جانە بىرەگەي وتا جاسالعان. ەلوردانىڭ عانا ەمەس وتاندىق مەديتسينانىڭ دامۋىنا ۇلەس قوسقانى ءۇشىن استاناداعى ۇلتتىق نەيروحۋريرگيا جانە ۇلتتىق كارديوحيرۋرگيا ورتالىقتارى «ەلوردا جۇزدىزدارى» ماراپاتىنا يە بولدى.
مۇنىمەن قوسا، استانا - سپورتتىق قالا. ونىڭ ىشىندە قازاقستاننىڭ بەس دۇركىن چەمپيونى، ۋەفا چەمپيوندار ليگاسىنىڭ تۋرنيرىندە ەل نامىسىن قورعايتىن جالعىز كوماندا - «استانا» فۋتبول كلۋبى. سونداي- اق، «بارىس» حوككەي كلۋبى دا الەم بىرىنشىلىكتەرىندە ەلوردانىڭ اتىنان لايىقتى ونەر كورسەتۋدە. جانە دە «استانا» ۆەلوكومانداسىن دا اتاپ وتكەن ءجون. بۇل اتالعان 3 سپورتتىق ۇيىمدا ايتۋلى سىيلىققا يە بولدى.
«ەلوردا جۇلدىزى» لاۋرەاتتارىنىڭ ءبىرى «جاستار» تەاترى. اتالمىش مەكەمەنىڭ العاشقى «شىڭعىسقان» اتتى قويىلىمى 2007 -جىلى كورەرمەنگە جول تارتقان بولاتىن. سودان بەرى تەاتر ءوز كورەرمەندەرىن جارقىن جاڭا قويىلىمدارىمەن قۋانتىپ كەلەدى، ال ارتىستەرى بەدەلدى رەسپۋبليكالىق جانە حالىقارالىق تەاتر فەستيۆالدەرىندە قۇرمەتتى ماراپاتتار يەلەنۋدە. ەرەكشە ايتىپ وتكەن ءجون بۇگىنگى كەش بارىسىندا «جاستار» تەاترى «ۇلى دالانىڭ جەتى قىرى» اتتى جاڭا قويىلىمدى ساحنالادى.
سونىمەن قاتار، وتاندىق ءازىل كلۋبتاردىڭ ىشىنەن العاش رەت ماسكەۋدە كوڭىلدى تاپقىرلار كلۋبىنىڭ جوعارى ليگاسىنىڭ چەمپيونى اتانعانى ءۇشىن «سپارتا- نوماد استانا» كتا كومانداسى «ەلوردا جۇلدىزى» سىيلىعىمەن ماراپاتتالدى.
كەش بارىسىندا قايرات باەكەنوۆ، الەن سامىكەن، اعايىندى جۇگۇنىسوۆتەر، سارا يساك، اينۇر ابدييەۆا جانە تاعى باسقا ەسترادا جۇلدىزدارى ءوز ونەرلەرىن كورسەتتى.