وزىق ءبىلىمى بار مامانداردى ۋىستان شىعارىپ الماۋىمىز كەرەك - داۋرەن ابايەۆ
بۇل تۋرالى بۇگىن ماجىلىستەگى «سيفرلىق قازاقستان» مەملەكەتتىك باعدارلاماسىنا ارنالعان ۇكىمەت ساعاتىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«وزدەرىڭىز دە بىلەتىندەي، 2017- جىلدىڭ قاڭتار ايىندا مەملەكەت باسشىسى قازاقستاننىڭ ءۇشىنشى جاڭعىرۋىنا بايلانىستى جاڭا باعىتتى ۇسىندى. اۋقىمدى ىستەردى شەشۋگە بەل بۋىپ قانا قويماي، «قازاقستاننىڭ 2050» ستراتەگياسىنداعى ماقساتتارعا جەتۋ جولىنداعى سەنىمدى جانە نىق كوپىر ورناتۋدىڭ ماڭىزدىلىعىنا توقتالدى. پرەزيدەنتىمىز، ءۇشىنشى جاڭعىرۋ جولىنداعى نەگىزگى كومپونەنتتەردىڭ ءبىرى رەتىندە، تۇرمىسىمىزعا سيفرلىق تەحنولوگيالاردى ەنگىزۋدىڭ قاجەتتىلىگىن ايتتى. وسىلايشا «سيفرلىق قازاقستان» مەملەكەتتىك باعدارلاماسىن جاساۋ تۋرالى ناقتى تاپسىرما بەردى»، - دەدى مينيستر.
ونىڭ اتاپ وتۋىنشە، بۇل ءدال ۋاقىتىندا جانە دەر كەزىندە جاسالعان ۇسىنىس بولدى. ويتكەنى بۇگىن، سيفرلاندىرۋ سالاسى دۇنيەءجۇزى بويىنشا، وتە اۋقىمدى ترەندكە اينالىپ وتىر. قازىرگى كەزەڭدە الەم ەلدەرىنىڭ دامۋ كورسەتكىشتەرى دە وسى سالامەن باعالانادى.
«بۇگىنگى كۇنى دامىعان ەلدەر تەحنولوگيالىق جارىستى جانداندىرىپ، سيفرلىق ءتارتىپتى بەلسەندى تۇردە قابىلداۋعا كوشتى. تەك ەۋرووداق ەلدەرىنىڭ وزىندە 2017 -جىلى ونەركاسىپتىك سيفرلاندىرۋ باعىتى بويىنشا 30-عا جۋىق ۇلتتىق جانە ايماقتىق باستاما قولعا الىنعان. «يندۋستريا 4.0» ەلەمەنتتەرىن ءساتتى ەنگىزۋ - بۇل ءبىزدىڭ ەلىمىزدىڭ ۇلتتىق قاۋىپسىزدىگىنە دە وڭ اسەرىن تيگىزەتىن شارۋا. ەلباسى اتاپ وتكەندەي، «سيفرلىق قازاقستان» مەملەكەتتىك باعدارلاماسىنىڭ تامىرى تەرەڭدە جاتىر. باعدارلاما ءبىزدىڭ ومىرىمىزگە اۋقىمدى وزگەرىس الىپ كەلەتىن، زامان تالابىنا ساي بولاشاققا ءتۇرلى باعىتتار اشاتىن بازيسكە اينالماق»، - دەدى ول.
وسى رەتتە داۋرەن ابايەۆ باعدارلامانىڭ نەگىزگى اسپەكتىلەرىنە توقتالدى.
«بىرىنشىدەن، كاسىپكەرلىك ورتادا باسەكەگە قابىلەتتىلىك ارتادى. سيفرلىق ەكونوميكانىڭ اۋقىمى شەكتەۋلى، مەملەكەتتىڭ كومەگىنە عانا جۇگىنىپ وتىرعان كومپانيالار ارقىلى قارقىندى دامىتۋ مۇمكىن ەمەس. ەكونوميكاداعى باستى باسىمدىق جەكە بيزنەسكە بەرىلۋى ءتيىس. ەكىنشىدەن، بۇلتتىق ەسەپتەۋ، جاساندى ينتەللەكت، ماشينالىق ءبىلىم بەرۋ، ۇلكەن دەرەكتەر قورى، ينتەرنەت زاتتار مەن تاعى باسقا دا تەحنولوگيالاردى ەركىن يگەرۋدى قولعا الۋ ماڭىزدى. ساراپشىلاردىڭ ستاتيستيكاسى بويىنشا، جاساندى ينتەللەكتى ەنگىزۋ 2030 -جىلى الەمدىك ىشكى جالپى ونىمگە 14 پايىز ءوسىم بەرەدى. بۇل قىتاي مەن ءۇندىستاننىڭ وندىرىستىك كاسىپورىندارىنىڭ قازىرگى جيىنتىق كولەمىنەن دە ارتىق كورسەتكىش»، - دەدى اقپارات جانە كوممۋنيكاتسيالار ءمينيسترى.
ۇشىنشىدەن، ونىڭ سوزىنە قاراعاندا، كادر دايىنداۋ ىسىنە باسا ءمان بەرۋ قاجەت.
«ارينە، مەملەكەتتىك باعدارلامانىڭ اياسىندا ءبىلىم بەرۋ ۇردىسىنە بارلىق ساتىلار بويىنشا ءتيىستى ءىس- شارالاردى قولدانىپ وتىرمىز. الايدا مەملەكەتتىك باستاماعا، ءبىلىم بەرۋ مەكەمەلەرى مەن جوعارى وقۋ ورىندارىنىڭ وزدەرى دە بەلسەندى ارالاسۋى كەرەك. قازىر ІТ- سالاسىنىڭ قىزمەتكەرلەرى الەم بويىنشا ەڭ قاجەتتى ماماندىقتار تىزىمىندە ەكىنشى ورىندا تۇر. وسى ورايدا، شەتەلدىك جۇمىس بەرۋشىلەرگە جوعارى دەڭگەيلى كادرلار اۋاداي قاجەت. سوندىقتان ءوزىمىزدىڭ وزىق ءبىلىمى بار ازاماتتاردى ۋىسىمىزدان شىعارىپ الماۋ باستى تالاپتاردىڭ ءبىرى. الەمدىك تاجىريبە كورسەتىپ وتىرعانداي، ەكونوميكانى جان- جاقتى نىعايتۋ ءۇشىن، ەڭبەك نارىعىنداعى ІТ مامانداردىڭ ۇلەسى ءۇش پايىزدان تومەن بولماعانى دۇرىس»، - دەدى ول.
وسى ورايدا، مينيستر قىتايدىڭ تاجىرەيبەسىن مىسالعا كەلتىردى. ولار بيىل، شەتەلدەردە قىزمەت ىستەپ، تابىس تاۋىپ جۇرگەن 432 مىڭ ІТ - ماماندارىن ەلدەرىنە قايتارىپ العان. بۇل قازاقستاننىڭ اقتوبە نەمەسە قاراعاندى سياقتى وبلىس ورتالىقتارىنداعى حالىق سانىمەن بىردەي كورسەتكىش.
«تورتىنشىدەن، بۇل سالاداعى نورما شىعارماشىلىق جۇمىستىڭ جوعارى دەڭگەيدە جالعاسا بەرۋى دە ايرىقشا ماڭىزعا يە»، - دەدى داۋرەن ابايەۆ.
اۆتور: مارلان جيەمباي