ۇلى دالانىڭ جەتى قىرى - فوردتار جەرىندە
شاراعا نورۆەگيا كورولدىگىنىڭ بيلىك، ساياسي پارتيالار، مەملەكەتتىك ەمەس جانە قوعامدىق ۇيىمدار، ب ا ق، بيزنەس، ديپلوماتيالىق كورپۋس، سونداي-اق جەرگىلىكتى قازاق دياسپوراسىنىڭ وكىلدەرى جينالدى.
قازاقستان ديپلوماتتارى قوناقتار نازارىنا ەلباسى نۇرسۇلتان نازاربايەۆتىڭ «قازاقستان جولى» كىتابىن نورۆەگ تىلىندە، سيرياداعى شيەلەنىستى جاعدايدى شەشۋدەگى استانانىڭ ۇلەسى تۋرالى «بىتىمگەر» ەڭبەگىن تاعى باسقا كىتاپتارىن اعىلشىن تىلىندە ۇسىندى.
جيىنعا قاتىسۋشىلار قازاقستان پرەزيدەنتىنىڭ «اتوم» باستاماسىنا قولداۋ ءبىلدىرىپ، ىسكە اسىرۋ ماقساتىندا يادرولىق سىناقتاردى توقتاتۋ جونىندەگى پەتيتسياعا قول كويۋ اكتسياسىنا قاتىستى.
شاقىرىلعاندار ەلباسىنىڭ قازاقستان حالقىنا جولداۋىندا جاريا ەتىلگەن باستامالارىمەن جانە جاقىندا جارىق كورگەن «ۇلى دالانىڭ جەتى قىرى» ماقالاسىندا ايتىلعان ۇلتتىق تاريحىمىزدىڭ، مادەنيەتىمىزدىڭ جاھاندىق وركەنيەتكە قوسقان ۇلەسى تۋرالى كەڭىنەن تانىستى.
سونداي-اق، قوناقتارعا قازاقستاننىڭ تۋريستىك مۇمكىندىكتەرى ارنايى ۇسىنىلدى. قازاقستاننىڭ تۋريستىك حابىنىڭ جاڭا مۇمكىندىكتەرى جايلى «قازاق تۋريزم» وتاندىق كومپانياسى مەن كەلەر جىلى تۇراقتى تۇردە ۇلى دالا ەلىنە تۋريستىك ساپارلار ۇيىمداستىرۋدى قولعا العان نورۆەگيالىق «ۆيتۋس» كومپانياسى جينالعاندارعا تولىققاندى اقپارات بەردى.
«ماكسيشيپينگ» لوگيستيكالىق كومپانياسىنىڭ كوممەرتسيالىق ديرەكتورى كريستيان كلەممەتسەن:
«قازاقستاننىڭ تۋريستىك مۇمكىندىكتەرىمەن قاتار ترانزيتتىك، لوگيستيكالىق مۇمكىندىكتەرى دە ءبىزدى قىزىقتىرادى. ءبىزدىڭ تەمىرجول ارقىلى جۇك تاسىمالدايتىن پويىزدارىمىز ەۋروپادان ورتالىق ازياعا تاۋار تاسيدى. سوندىقتان قازاقستاننىڭ قۇرلىقتاعى لوگيستيكاسىنا سۇرانىس جوعارى. شىنىندا دا، بۇل وتە ءتيىمدى مارشرۋت، تەڭىز جولىنان جىلدام، اۋە قاتىناسىنان الدە قايدا ارزان»، - دەپ اتاپ ءوتتى.
قازاقستان پرەزيدەنتىنىڭ ۇلتتىق سانانى تۇلەتكەن «ۇلى دالانىڭ جەتى قىرى» ماقالاسىندا ايتىلعان تەرەڭ ويلاردى جاھانعا جەتكىزۋ ماقساتىندا، قازاقتىڭ تاريحى مەن مادەنيەتىنەن مول ماعلۇمات بەرەتىن «ءسان مەن ساحنا» حالىقارالىق فەستيۆالىنىڭ كورسەتىلىمى بولدى. فەستيۆال ديرەكتورى، بەلگىلى ەتنو ديزاينەر حانۋم ايداشتىڭ بۇل سكانديناۆيا ەلىنە ەكىنشى ساپارى. وسى جولى فەستيۆال شەڭبەرىندە نورۆەگيالىقتارعا قىزىلوردالىق ەتنوديزاينەر قارلىعاش ءىلياسوۆا مەن اقتاۋلىق ءمولدىر بەكىبايەۆانىڭ «شىن جۇرەكتەن» كوللەكتسياسى تانىستىرىلىپ، جينالعانداردى تامساندىردى.
وسلو قالاسىنداعى «كون-تيكي» مۇراجايىنىڭ ديرەكتورى مارتين بيل:
«مەن ءۇشىن نورۆەگياداعى قازاقستان كۇنىنە قاتىسۋ ۇلكەن قۇرمەت. قازاق ۇلتتىق كيىم ۇلگىلەرى تانىستىرىلعان شوۋ وتە كەرەمەت بولدى. قازاقستان نورۆەگيادان وتە الىس، سوندىقتان مەن ميلليونداعان سكانديناۆيالىقتار ساناتىندا قازاق جەرىمەن، مادەنيەتىمەن تانىس ەمەس ەدىم. الايدا، بۇگىنگى شارانىڭ ارقاسىندا ۇلى دالا ەلىمەن دە، حالقىمەن جاقىنىراق تانىسىپ، ءتانتى بولدىم»، - دەدى وسلو قالاسىنداعى «كون-تيكي» مۇراجايىنىڭ ديرەكتورى مارتين بيل تاڭ قالعاندىعىن جاسىرماي.
سۋرەتتەرى الەمنىڭ ونداعان ەلدەرىندە جەكەلەگەن كوللەكتسيالاردا ساقتالعان، بەلگىلى سۋرەتشى، قازاقستان ەڭبەك سىڭىرگەن مادەنيەت قايراتكەرى گۇلميرا تەلعوزيەۆانىڭ سۋرەت كورمەسى دە ۇلى دالا وركەنيەتى مەن ۇلتتىق بولمىسىمىزدى ۆيكينگتەر ەلىنە تانىتۋدىڭ زاڭدى جالعاسى ىسپەتتەس بولدى.
«نورۆەگياداعى قازاقستاننىڭ ۇلتتىق كۇنى» قازاقستان تاۋەلسىزدىگىنىڭ 27 جىلدىعىنا ارنالعان ديپلوماتيالىق قابىلداۋمەن اياقتالدى. جيىن بارىسىندا نورۆەگيا كورولدىگىندەگى قازاقستاننىڭ ۋاقىتشا سەنىمدى وكىلى ءىلياس وماروۆ ەكى جاقتى بايلانىستى دامىتۋ باعىتىندا ۇستىمىزدەگى جىلى اتقارىلعان جۇمىستار جايلى ايتىپ بەردى.
ديپلومات قازاقستان نورۆەگيا ەلىمەن جان جاقتى كەڭىنەن سەرىكتەستىك ورناتۋعا نيەتتى ەكەنىن، «سوندىقتان قازاقستاندىقتار فوردتار ەلى تۋرالى، ال نورۆەگيالىقتاردىڭ ۇلى دالا ەلى جايلى تانىمى بارىنشا وسەتىنى ءسوزسىز»، دەپ اتاپ ءوتتى.