ومبىدا رەسەي قازاقتارىنىڭ كىشى قۇرىلتايى ءوتىپ جاتىر
القالى جيىندا ەلباسىنىڭ بيىلعى جولداۋى، كورشى مەملەكەتتەگى باۋىرلارىمىزعا مادەني-رۋحاني جاردەم بەرۋ، وقۋ ءبىلىم جاعىنان قولداۋ كورسەتۋ سىندى ماسەلەلەر قارالدى.
رەسەيدىڭ ومبى وبلىسى - قازاقتاردىڭ كوپتەپ قونىستانعان وڭىرلەرىنىڭ ءبىرى. ونىڭ ۇستىنە قازاقستانمەن شەكارالاس ايماقتا ورنالاسقان. ياعني، «اۋىلى ارالاس، قويى قورالاس».
جالپى، رەسەي قازاقتارىنىڭ كىشى قۇرىلتايى بۇدان بىلاي جىل سايىن ۇيىمداستىرىلىپ تۇراتىن بولادى. ال سوڭعىسى وسىدان ءۇش جىل بۇرىن ساراتوۆ قالاسىندا وتكەن ەدى.
ال بۇگىنگى جيىنعا رەسەيدىڭ 25 ءوڭىرى مەن قازاقستاننىڭ بىرنەشە وبلىستارىنان دەلەگاتتار قاتىسىپ، اسا ماڭىزدى دەگەن ماسەلەلەردى تالقىلاپ جاتىر.
بولاشاقتا ەندى زەرتتەۋ جۇمىستارىمەن اينالىسۋعا دەن قويىلماق.
باتىرحان جۇمابايەۆ، «قاسيەتتى قازاقستان» عىلىمي- زەرتتەۋ ورتالىعى ديرەكتورىنىڭ ورىنباسارى:
- العا قويعان ماقسات - 2019-2021-جىلدارى ەلىمىزدەن تىس، سىرتتا جاتقان تاريحي تۇلعالارىمىزعا بايلانىستى قاسيەتتى ورىنداردى دارىپتەۋ، زەرتتەۋ. اتاپ ايتاتىن بولسام، ەندى ءبارىمىز بىلەتىن استراحاندا اتاقتى كۇي اتاسى قۇرمانعازىمىز بار. جاقىندا عانا يالتادا بايدوللا بوكەيەۆ دەگەن جاڭگىرحاننىڭ بالاسى بار. ول تۇڭعىش گەنارال بولعان. تۇمەن وبلىسىندا يشيم قالاسىندا باۋبەك باتىرىمىز بار. سونىڭ بارلىعىن تولىققاندى زەرتتەۋگە وسى قاۋىمداستىق سەبەپكەر بولىپ جانە وسىنداعى رەسەيدەگى قازاقتار ءوز كومەگىن تيگىزسە ەكەن دەپ كەلىپ وتىرمىز»، - دەيدى «قاسيەتتى قازاقستان» عىلىمي-زەرتتەۋ ورتالىعى ديرەكتورىنىڭ ورىنباسارى باتىرحان جۇمابايەۆ.
بۇگىندە ومبى وبلىسى - قازاقيلىقتىڭ قايماعى بۇزىلماعان ءوڭىر. قازىر مۇندا 100 مىڭعا جۋىق قانداسىمىز تۇرادى. ادەت-عۇرپىمىز بەن مادەنيەتىمىزدى ساقتاپ قالۋعا بارلىق جاعداي جاسالعان. ءتىپتى ۇلتتىق قۇندىلىقتارىمىزدى دارىپتەيتىن بىرنەشە ورتالىق تا بار. ال مۇنداعى مەكتەپتەردە قازاق ءتىلى ءپانى شەتى ءتىلى رەتىندە وقىتىلا باستاعان.
ايتا كەتسەك، اتالعان شارانى وتكىزۋگە «وتانداستار» قورى مەن دۇنيەجۇزى قازاقتارى قاۋىمداستىعى مۇرىندىق بولىپ وتىر.