تۇندە كورەتىن قۇرال سارىاعاشتا شەكارا بۇزۋشىنى ۇستاۋعا كومەكتەستى

سارىاعاش. قازاقپارات - سارىاعاشتىق شەكاراشىلار وزبەكستاننان ءبىزدىڭ ەلگە جاسىرىن وتپەكشى بولعان مەملەكەتتىك شەكارا بۇزۋشىنى ۇستادى، دەپ حابارلايدى قازاقپارات ۇ ق ك ش ق باسپا ءسوز قىزمەتىنە سىلتەمە جاساپ.

كوزگە تۇرتسە كورگىسىز ءتۇن قاراڭعىلىعىندا بۇتادان بۇتاعا جۇگىرىپ، جان-جاعىنا جالتاقتاي قاراپ، باسپالاپ كەلىپ تىكەنەك سىمدى قورشاۋدىڭ ۇستىنەن ورمەلەپ، ءبىزدىڭ ەلدىڭ اۋماعىنا قاراي ءوتىپ كەلە جاتقان شەكارا بۇزۋشىنى ەڭ ءبىرىنشى بولىپ وڭتۇستىك شەكارانىڭ سارىاعاش شەكارا جاساعىنا قاراستى «قاپلانبەك» زاستاۆاسىنىڭ تۇندە كورەتىن قۇرالمەن جابدىقتالعان بەينەباقىلاۋ وپەراتورى بايقاعان.

ول راديوستانتسيا ارقىلى سول ماڭداعى شەكارا ناريادىنا حابار بەرگەن. شەكارا بۇزۋشىنىڭ باعىتى تۋرالى اقپاراتتى العان شەكارا ناريادىنىڭ باسشىسى بويلارىن تاسالاپ، «شاقىرىلماعان قوناقتى» قارسى الدىنان توسىپ الدى.

ۇستالعان ادام وزبەكستان ازاماتى بولىپ شىقتى. وزىمەن بىرگە ەشقانداي قۇجاتى جوق. قۇقىق قورعاۋ ورىندارىنا حابارلانىپ، ونىڭ كىم ەكەندىگىن انىقتاۋ جۇمىستارى جۇرگىزىلۋدە.