تارازدا جۇرەگى وڭ جاعىندا ورنالاسقان وقۋشى قىز تۇرادى
ميلليوننىڭ بىرىندە عانا بولاتىن ەرەكشەلىككە يە جاس ءوسپىرىمنىڭ دەنساۋلىعىندا ەشقانداي كىنارات جوق، دەپ حابارلايدى قازاقپارات.
ايدانا ماحامبەت بۇگىندە تارازداعى 3№ مەكتەپ-ليتسەيدىڭ 6 «ءا» ليتسەي سىنىبىندا وقيدى. وقۋ وزاتى. ونىڭ ءبي بيلەپ، ءان سالاتىن ونەرى دە بار. ماتەماتيكا پانىنە دەگەن بەيىمى تەرەڭ.
اكەسى - اسىلبەك ەستايەۆ كولىك جۇرگىزۋشىسى بولىپ ەڭبەك ەتەدى. بىزگە بۇل تۋرالى اناسى - ينديرا كەنجەبايەۆا ايتىپ بەردى.
«ءبىز قىزىمىزدىڭ جۇرەگىندەگى مۇنداي ەرەكشەلىكتى ايدانا ءتورت جاسقا كەلگەنشە بايقاعان جوقپىز. كوپ اۋىرعان ەمەس. ءتورت جاسىندا قاتتى جوتەلە بەرگەن سوڭ، رەنتگەنگە تۇسىرگەنبىز. دارىگەرلەر جۇرەكتىڭ ورنى الماسىپ كەتكەنىن سول كەزدە بايقادى. وسى جاعدايدى ەستىگەن سوڭ، ءوزىمىزدىڭ ايماقتاعى 9№ ەمحانا دارىگەرلەرىنە ابدەن تەكسەرىلدىك. ولار جۇرەك سوعىسىنىڭ بەلسەندى، بالانىڭ دامۋ جاعدايى ءبىرقالىپتى ەكەنىن، مۇنداي جاعدايدىڭ ميلليوننان ءبىر ادامدا كەزدەسە بەرەتىنىن ايتىپ، كوڭىلىمىزدى ورنىنا ءتۇسىردى»، - دەيدى اناسى.
ايدانا دا دەنساۋلىعىنىڭ جاقسى، ەش جەرى اۋىرمايتىنىن ايتادى. ەرەكشەلىگىن اللانىڭ ءبىر سىيى دەپ قابىلدايدى. بولىمشەدەگى مەيىربيكەلەر ءجيى كەلىپ ونىڭ جاعدايىن ءبىلىپ تۇرادى ەكەن. ءۇيدىڭ تۇڭعىشى ول قاشاندا ءىنى-قارىنداستارىنا قامقور. ءوزى بەلسەندى، ۇقىپتى، پىسىق. سوزگە شەشەن. كەيدە ۇلكەن كىسىلەردەي تاۋىپ ايتاتىن دا قاسيەتى بار ەكەن. ونىڭ ارمانى - تىگىنشى، ديزاينەر بولۋ.
«مەن مەكتەپتەگى، ۇيدەگى بارلىق شارۋاعا بەلسەنە ارالاسامىن. ءبىلىم ورداسىندا وتەتىن ءىس-شارالاردا ءان سالامىن. ءبىراق، مەكتەپتە ەلىمىزدىڭ ءانۇرانى ورىندالعان كەزدە قولىمدى وڭ جاعىما ۇستايمىن. وعان ۇستازدارىم بۇل جاعدايعا توسىرقاپ، وقۋشىلاردان ەرەكشەلەنبە دەيدى. ءبىراق، مەنىڭ جۇرەگىم وڭ جاعىمدا ەمەس پە؟»، - دەدى ايدانا.