سىعاناق قالاشىعى يۋنەسكو دۇنيەجۇزىلىك مۇرالار تىزىمىنە ەنگىزىلمەك

قىزىلوردا. قازاقپارات -  قىزىلوردا وبلىسى جاڭاقورعان اۋدانى اۋماعىندا ورىن تەپكەن سىعاناق قالاشىعىن الداعى ۋاقىتتا يۋنەسكونىڭ دۇنيەجۇزىلىك مۇرالار تىزىمىنە ەنگىزۋ جوسپارلانىپ وتىر.

قازىر وسى ماقساتتا ءتيىستى ءىس-شارالار قولعا الىنعان، دەپ حابارلايدى قازاقپارات ءتىلشىسى.

ايتا كەتەرلىگى، جاقىندا «قورقىت اتا» مۇراسى يۋنەسكونىڭ ماتەريالدىق ەمەس مۇرالارى تىزىمىنە ەنگەن ەدى.

«قازىرگى تاڭدا قىپشاقتار مەن قازاق حاندىعىنىڭ ەجەلگى استاناسى - سىعاناق قالاشىعىندا ساۋلەت قۇرىلىستارىن قالپىنا كەلتىرۋ جانە تسيفرلاۋ جۇمىستارى جۇرگىزىلۋدە. تاريحي نىساندا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ ارحەولوگيا عىلىمي- زەرتتەۋ ورتالىعى زەرتتەۋ جۇرگىزىپ كەلەدى.

ال قالپىنا كەلتىرۋ جۇمىستارىمەن «قازرەستاۆراتسيا» رمك اينالىسادى.

«سىعاناق قالاشىعى يۋنەسكو دۇنيەجۇزىلىك مۇرالارىنىڭ الدىن الا تىزىمىنە ەنگىزىلدى. سىعاناق وزگە مادەني-تاريحي ەسكەرتكىشتەر سەكىلدى مادەني-تاريحي ورتالىق جانە تۋريستەر ءجيى باراتىن ورىن بولادى دەپ جوسپارلانۋدا. الداعى ۋاقىتتا سىعاناق قالاشىعىنىڭ شىعىس قاقپاسىن 3 مەترگە دەيىن كوتەرىپ، بۇرىنعى ساۋلەتتىك كەلبەتىن قايتاراتىن بولادى»، - دەپ ءمالىم ەتتى  قىزىلوردا وبلىسى اكىمىنىڭ باسپا ءسوز قىزمەتى.

ءوڭىر اۋماعىنداعى ەجەلگى سىعاناق، شىرىك رابات، جانكەنت قالاشىقتارى جانە تۇركى تايپالارىنىڭ بۇرىنعى استانالارىنا قاجەتتى سەرۆيستىك ينفراقۇرىلىمداردى جۇرگىزىپ، سونىڭ نەگىزىندە تۋريستىك كلاستەر قۇرۋ كوزدەلىپ وتىر.

ايتا كەتكەن ءجون، سىعاناق قالاشىعى قىپشاق حاندىعى (ХІ-ⅩⅢ عاسىرلار)، اق وردا (ХІІІ-ХІV عاسىرلار) جانە قازاق حاندىعىنىڭ (ХV- ХVІІ عاسىرلار) استاناسى جانە ۇلى جىبەك جولىنىڭ ساۋدا ورتالىقتارىنىڭ ءبىرى بولعان.

ەستەرىڭىزگە سالا كەتەلىك، بۇدان بۇرىن  قىزىلوردا وبلىسىندا بالالارعا ارنالعان ارحەولوگيالىق لاگەر اشۋ جوسپارلانىپ وتىرعانى حابارلاندى. سونداي-اق، بيىل سىر وڭىرىندەگى سىعاناق قالاشىعىن ەتونوتۋريزم ورتالىعىنا اينالدىرۋ جۇمىستارى جۇرگىزىلدى.