شەتەلدىكتەر قازاق باتىرلارىمەن سۋرەتكە ءتۇسۋ ءۇشىن كەزەككە تۇرۋدا

استانا. قازاقپارات -  «ارلان جەتەۋ» اتتى ۇلتتىق داستۇرلەر تەاترىنىڭ اكتەرلەرى باتىر كوشپەندىلەردىڭ وبرازىمەن  شەتەلدى تاڭعالدىرۋدا.

بۇل تۋرالى «كازاحستانسكايا پراۆدا» باسىلىمىنا سىلتەمە جاساپ، Stan.kz اقپاراتتىق اگەنتتى حابارلايدى.

قازاق ەرتەگىلەرىندەگى قايسار باتىرلارعا ۇقساعان ەلىمىزدىڭ ازاماتتارى حالىقارالىق شارالارعا قاتىسىپ، وزگە مەملەكەتتەردى ارالاپ جۇرتتى تاڭعالدىرۋدا. ولاردى كورگەن ادامداردىڭ قازاق تاريحى مەن مادەنيەتىنە قىزىعۋشىلىعى ويانادى ەكەن.

«ءبىزدىڭ تەاتر شامامەن الەمنىڭ بارلىق جەرلەرىندە بولىپ قايتتى. ءبىزدى تەك وڭتۇستىك جانە سولتۇستىك پوليۋستاعىلار عانا كورگەن جوق»، - دەپ قالجىڭدادى تەاتردىڭ جەتەكشىسى ءمۇسلىم جۇماعاليەۆ.

پاريج، بەرلين، پەكين، سينگاپۋر، گونكونگ تۇرعىندارىن تاڭعالدىرۋ مۇمكىن ەمەس دەپ ويلاساڭىز، قاتەلەسكەنىڭىز. ولار كوشەدە جۇرگەن الىپ قازاقستاندىقتاردى كورگەندە تامسانىپ، تاڭدانادى. تەلەفوندارىنا تۇسىرەدى. قاي ەلدەن كەلگەندەرىن سۇراپ، سۋرەتكە ءتۇسۋ ءۇشىن كەزەككە تۇرادى.

باتىردىڭ ءرولىن سومداپ جۇرگەن اكتەرلەر قاتىسقان شارالاردى ساۋساقپەن ساناپ شىعۋ مۇمكىن ەمەس. ولار ەۆروپا ەلدەرىندەگى قازاقستان كۇنىندە، جىبەك جولىنا ارنالعان شاراعا، تۇرىك حالىقتارىنا ورتاق مەيرامدارعا، رەسپۋبليكالىق ەتنوفەستيۆالدارعا قاتىسىپ ۇلگەرگەن.

تەاتردا ەكى جۇزگە جۋىق ادام ەڭبەكتەنەدى. تورتتەن ءبىر بولىگى قىزدار. تەاتردا 40 باتىر بار. جىگىتتەردىڭ بويى 195 سانتيمەتردەن باستالادى. ەرتاي قادىروۆ ەسىمدى اكتەردىڭ بويى 217 سانتيمەتر. ول تەاترداعى بويى ەڭ ۇزىن باتىر.

«ءبىزدىڭ جىگىتتەردى كينوعا تۇسۋگە، تەلەۆيزيالىق، تاريحي باعدارلامالارعا قاتىسۋعا ءجيى شاقىرادى»، - دەيدى ءمۇسلىم جۇماعاليەۆ.

تەاتر كوللەكتسياسىندا ءۇش جۇزگە جۋىق كوستيۋم بار. ولاردىڭ ەڭ جەڭىلى 10، ال ەڭ اۋىرى 30 كيلوگرامعا دەيىن جەتەدى. تەاترعا كەز كەلگەن الىپ ادام قابىلدانبايدى. ۇمىتكەرلەر تەاترعا جۇمىسقا ورنالاسۋ ءۇشىن قازاقستان تاريحىنان جانە IQ دەڭگەيىن انىقتايتىن تەست تاپسىرۋى كەرەك.

تەاتردا كاسبي، وقىعان اكتەرلەر تەك 15 پايىز عانا. قالعاندارى ءارتۇرلى ماماندىق يەلەرى. ناقتىراق ايتقاندا، سپورتشىلار، اسكەري ادامدار، بانك قىزمەتكەرلەرى، داياشىلار، تەمىرجولشىلار.