گاندبول: قازاقستان قىزدارى وڭتۇستىك كورەيادان جەڭىلدى

استانا. قازاقپارات - جاپونيانىڭ كۋماموتو قالاسىندا گاندبولدان قىزدار اراسىندا ازيا بىرىنشىلىگىنىڭ جارتىلاي فينال ويىندارى ءوتتى.

جارىستىڭ بۇل ساتىسىندا قازاقستان قۇراماسى وڭتۇستىك كورەيا قىزدارىمەن شەبەرلىك بايقاستى، دەپ حابارلايدى قازاقپارات ءتىلشىسى.

اتالمىش كەزدەسۋدە قازاقستاندىق گاندبولشىلار قارسىلاستارىنا 23:31 ەسەبىمەن جەڭىلىپ قالدى. ويىننىڭ العاشقى كەزەڭى تارتىستى ءوربىدى. قازاقستان گاندبولشىلارى ءبىرىنشى كەزەڭدە 13:14 ەسەبىمەن جەڭىلىپ قالعانىمەن قارسىلاستارىنا لايىقتى دەڭگەيدە قارسىلىق كورسەتە الدى. دەگەنمەن ەكىنشى كەزەڭدە كورەي سپورتشىلارى باسىم وينادى. ولار ءبىزدىڭ قاقپاعا 18 گول سوقتى. وعان قازاقستان قىزدارى نەبارى 9 عانا گولمەن جاۋاپ قايىردى. ويىندا ەلىمىزدىڭ قۇراماسى 23:31 ەسەبىمەن جەڭىلىپ قالدى.

قازاقستان گاندبولشىلارى ەندى 9 -جەلتوقساندا قىتاي قۇراماسىمەن شەبەرلىك بايقاسادى. قىتايلىقتار بۇگىن جارتىلاي فينالدا جاپونيادان 21:23 ەسەبىمەن جەڭىلىپ قالعان ەدى.

قازاقستان بيىلعى ازيا بىرىنشىلىگىندە ا توبىندا سىنعا ءتۇستى. وندا اۆستراليانى 32:24، يراندى 41:26، جاڭا زەلانديانى 51:14 ەسەبىمەن جەڭدى.

ەستەرىڭىزگە سالا كەتەلىك، قازاقستاننىڭ قىزدار قۇراماسى بۇعان دەيىن ەكى مارتە ازيا چەمپيونى اتاعىن جەڭىپ الدى.

العاش 2002 -جىلى وڭتۇستىك كورەيادان 27:25 ەسەبىمەن باسىم تۇسسە، 2010 -جىلى سول قارسىلاسىن فينالدا 33:32 ەسەبىمەن جەڭدى. اتالمىش ەكى ازيا بىرىنشىلىگى دە الماتى قالاسىندا وتكەن ەدى.

سونداي-اق، ءبىزدىڭ قۇراما سوڭعى ءۇش ازيا بىرىنشىلىگىندە ءتورتىنشى ورىنعا تۇراقتادى. بۇگىنگى كۇنگە دەيىن قازاقستان قۇراماسى ازيا بىرىنشىلىگىنە توعىز مارتە قاتىسقان.

ازيا بىرىنشىلىگى 1987 -جىلدان بەرى تۇراقتى تۇردە وتكىزىلىپ كەلەدى. بۇگىنگى كۇنگە دەيىن نەبارى ءۇش قۇراما عانا قۇرلىق چەمپيونى اتانعان. قازاقستاننان باسقا وڭتۇستىك كورەيا مەن جاپونيا وسىنداي تابىسقا قول جەتكىزگەن. وڭتۇستىك كورەيا 13، جاپونيا 1 مارتە التىننان القا تاقتى.