استانا قالاسىنىڭ قۇرىلىسى ەندى قاي باعىتتا سالىنادى

استانا. قازاقپارات - الداعى بەس جىلدا ەلودانىڭ ءتورت اۋدانىندا قۇرىلىس نىساندارىن كوپتەپ سالۋ جوسپارلانعان، دەپ حابارلايدى قازاقپارات ءتىلشىسى.

قالا اكىمىنىڭ ورىنباسارى سەرگەي حوروشۋننىڭ ايتۋىنشا، الدىمەن مىڭجىلدىق اللەياسىنىڭ بويىمەن قۇرىلىس قارقىنى تولاستامايدى. وعان تاۋەلسىزدىك مونۋمەنتىنەن باستاپ نۇرلى جول ۆوكزادىنا دەيىنگى تەرريتوريا كىرەدى.

«ول جەردە 15 مىڭنان استام پاتەر سالىنادى. قاجەتتى كولىكتىك- ينجەنەرلىك ينفراقۇرىلىم دا بولادى. ەكىنشى اۋدان - ماڭگىلىك ەل داڭعىلى. ونىڭ بويىمەن قۇرىلىس نىساندارىن كوتەپ سالۋ جوسپارلانعان. ەكسپو كورمەسىنە جاقىن جەرلەر، سوسىن مەديتسينالىق مەكەمەلەردىڭ ارتىنداعى جەرلەر يگەرىلەدى. ۇشىنشىدەن، تۇران داڭعىلى بويىندا ءبىراز جۇمىستار بار. حان- شاتىردىڭ ارتىنداعى جەرگە دە تۇرعىن ۇيلەر سالىنادى. ال ءتورتىنشى اۋدان - تەلمان. باس كەزىندە ول جەردە 2 مىڭ گەكتاردا قۇرىلىس نىساندارى بولادى دەپ جوسپارلاعان بولاتىنبىز. ءبىراق بەرتىن كەلە، اتالعان جوسپار قىسقارتىلدى. جاقىن ارادا تەك 200 گەكتارعا عانا ۇيلەر سالىنادى. قالعانى كەيىنگە قالاتىن بولدى»، - دەدى س. حوروشۋن استانادا وتكەن باسپا ءسوز ءماسليحاتىندا.

ونىڭ ايتۋىنشا، ءاربىر اۋدان بويىنشا سۋ، ەنەرگيا، جىلۋ جانە كارىزدىك جۇيەلەردى تارتۋ ماسەلەلەرى پىسىقتالدى. الداعى ۋاقىتتا گازدى جەتكىزۋ جايى دا ەسكەرىلەدى.

«وسى جۇمىستىڭ ناتيجەسىندە كەشەندى جوسپار قابىلداندى. قىركۇيەك ايىندا ۇكىمەت ارنايى قاۋلىسىمەن اتالعان قۇجاتتى بەكىتتى. ەندى، وسى جوسپارعا قاراي بارلىق بيۋدجەتتىك وتىنىشتەرىمىزدى كەلتىرەتىن بولامىز»، - دەپ اتاپ كورسەتتى س. حوروشۋن.