قازاقستان ايەلدەرىنىڭ بيزنەستەگى بەلسەندىلىگى ارتتى - ق ر مەملەكەتتىك حاتشىسى

 استانا. قازاقپارات - بۇگىن استانادا «قازاقستاننىڭ وتباسىلىق جانە گەندەرلىك ساياساتى: جەتىستىكتەر مەن پەرسپەكتيۆالار» تاقىرىبىندا حالىقارالىق كونفەرەنسيا باستالدى.

اتالمىش شارا ق ر پرەزيدەنتى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيانىڭ 20 جىلدىعىنا ارنالىپ ۇيىمداستىرىلدى، دەپ حابارلايدى قازاقپارات.

بۇل شاراعا ۇلتتىق كوميسسيا مۇشەلەرى، پارلامەنت دەپۋتاتتارى، مەملەكەتتىك ورگانداردىڭ باسشىلارى، ديپلوماتيالىق كورپۋس، حالىقارالىق ۇيىمدار، بيزنەس قۇرىلىمدار، ازاماتتىق قوعام وكىلدەرى قاتىسۋدا.

ق ر مەملەكەتتىك حاتشىسى گۇلشارا ءابدىقالىقوۆا ۇلتتىق كوميسسيانىڭ 20 جىلدىعى قىزمەتى بارىسىندا گەندەرلىك تەڭدىك ستراتەگياسى ىسكە اسىرىلعانىن ەسكە سالدى. گەندەرلىك باعىتتاعى «ەرلەر مەن ايەلدەردىڭ تەڭ قۇقىقتارىنىڭ جانە تەڭ مۇمكىندىكتەرىنىڭ مەملەكەتتىك كەپىلدىكتەرى تۋرالى» ، «تۇرمىستىق زورلىق- زومبىلىق پروفيلاكتيكاسى تۋرالى» زاڭدار قابىلداندى. قازاقستان رەسپۋبليكاسىنداعى 2030 -جىلعا دەيىنگى وتباسىلىق جانە گەندەرلىك ساياسات تۇجىرىمداماسى جۇزەگە اسىپ جاتىر. بارلىق مەملەكەتتىك ورگاندا گەندەرلىك ساياساتتى ىسكە اسىرۋعا جاۋاپتىلار انىقتالدى.

«مەملەكەتتىك ساياساتتىڭ ماڭىزدى باسىمدىعىنىڭ ءبىرى - انا مەن بالانى قورعاۋ، ايەلدەردىڭ قۇقىعى مەن مۇمكىندىكتەرىن كەڭەيتۋ. قازاقستاننىڭ وتباسىلىق- گەندەرلىك ساياسات سالاسىنداعى جەتىستىكتەرى مەملەكەتتىك ورگاندار، ازاماتتىق قوعام جانە بيزنەس قاۋىمداستىقتارىنىڭ ءوزارا ءتيىمدى ءىس- ارەكەتى ناتيجەسىندە مۇمكىن بولدى» ، - دەدى ءابدىقالىقوۆا.

بۇگىندە دەپۋتاتتاردىڭ جالپى سانىنىڭ 22 پايىزى نەمەسە 34 ءى ايەل.

«مەملەكەتتىك قىزمەتتە 55 پايىزعا جۋىق، ساياسي مەملەكەتتىك قىزمەتشىلەر اراسىندا 10 پايىزدان استام ايەل قىزمەت ەتەدى» ، - دەپ ناقتىلادى مەملەكەتتىك حاتشى.

سونىمەن قاتار، قازاقستاندىق ايەلدەردىڭ ەكونوميكالىق مۇمكىندىكتەرى ارتىپ، بيزنەس سالاسىنداعى بەلسەندىگى جوعارىلالدى. شاعىن جانە ورتا بيزنەستە 500 مىڭنان اسا كومپانيانى ايەلدەر باسقارادى. نازىك جاندار بارلىق جۇمىس ورىندارىنىڭ ۇشتەن ءبىرىن قۇردى.

گۇلشارا ءابدىقالىقوۆا بۇگىن كونفەرەنسيا بارىسىندا ايتىلعان جاڭا يدەيالار، ويلار مەن تىڭ ۇسىنىستار ۇلتتىق كوميسسيانىڭ ودان ارعى جۇمىسىندا قولدانىلاتىنىن اتاپ ءوتتى.