استانانى تۇمشالاعان قويۋ ءتۇتىن نەدەن پايدا بولادى
استانا قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسى قالا اسپانىنداعى قويۋ ءتۇتىننىڭ پايدا بولۋ سەبەبىن ءتۇسىندىردى.
«وسى كۇندەرى استانا اسپانىندا قويۋ ءتۇتىن تۇر، ونىڭ سەبەبى اۋا رايىنىڭ قولايسىزدىعى (جەلسىز تۇمان) جانە جەر ۇيلەردىڭ ءۇيدى جىلىتۋ ءۇشىن كومىردى جاعۋى» دەپ حابارلادى قورشاعان ورتانى قورعاۋ جانە تابيعاتتى پايدالانۋ باسقارماسى.
سونىمەن قاتار، استانا قالاسىنىڭ اتموسفەرالىق اۋاسىن لاستاۋدىڭ نەگىزگى كوزدەرى 1, 2- ج ە و جانە اۆتونومدى قازاندىقتار لاستاۋشى زاتتاردىڭ جالپى شىعارىندىلارىنىڭ %95,5 استامىن قۇراپ وتىر.
قالانىڭ اۋا كەڭىستىگىن جاقسارتۋ ماقساتىندا ءبىرقاتار جۇيەلى جۇمىستار اتقارىلعان: كوممۋنالدىق شارۋاشىلىقتاردىڭ 854 تەحنيكاسى گازعا اۋىستىرىلعان، ءوز كولىكتەرىنە گاز ورناتۋعا 14 مىڭنان استام زاڭدى جانە جەكە تۇلعاعا رۇقسات بەرىلگەن.
استانا اكىمدىگىنە قىزمەت كورسەتەتىن 500 تاكسيدى گازعا كوشىرۋ بويىنشا مەموراندۋمعا قول قويىلدى.
سونىمەن قاتار، قالا اكىمىنىڭ تاپسىرماسى بويىنشا «استانا قالاسىنىڭ 2018-2020 -جىلدارعا ارنالعان قورشاعان ورتانى ساۋىقتىرۋ بويىنشا كەشەندى ءىس- شارالار جوسپارى» جاسالىپ بەكىتىلىپ، «استانا قالاسىندا گاز تاراتۋ جەلىلەرىنىڭ قۇرىلىسى جانە تۇرعىن الاپتارى مەن جەكە سەكتوردى تابيعي گازگا اۋىستىرۋ بويىنشا جول كارتاسى» ازىرلەنگەن.
گازداندىرۋ ستانتسياسى ىسكە قوسىلدى. وعان «نازاربايەۆ ۋنيۆەرسيتەتى» ، عارىش ورتالىعى اكادەمياسى، قورعانىس مينيسترلىگى قوسىلعان. بۇدان بولەك، اكىمدىك «استانا قالاسىنىڭ 2030 -جىلعا دەيىنگى تومەن كومىرتەكتى دامۋ ستراتەگياسىن» جاساۋدا، ول پارنيكتىك گازدار شىعارىندىلارىن ازايتۋ بويىنشا حالىقارالىق مىندەتتەمەلەردى ورىنداۋعا جانە ەنەرگيا ۇنەمدەۋ ماسەلەلەرىن شەشۋگە مۇمكىندىك بەرەدى.
جالپى العاندا، قازاقستان استاناسىنىڭ اۋا باسسەينىنىڭ جاي- كۇيى حالىقتىڭ تىرشىلىك ەتۋى ءۇشىن ەكولوگيالىق تۇرعىدان قولايلى رەتىندە سيپاتتالادى.