بيزنەسمەندەر «كاسىبي ماماندار جوق» دەپ ءجيى ارىزدانادى - ۇكىمەت باسشىسى
"الدىڭعى كۇنى مەن چەمپيوناتقا ارنايى بارىپ، قىزىقتى ءارى تارتىستى باسەكەنى كوردىم. سول كەزدە جاستاردىڭ تاراپىنان WorldSkills قاۋىمداستىعىن باسقارۋعا ۇسىنىس ءتۇستى. مەن وسى ۇسىنىسقا كەلىسكەنىمە وكىنبەيمىن. سوسىن ول كۇنى "اتامەكەن" پالاتاسىنىڭ وتىرىسىنا دا قاتىستىم. جيىندا ءبىزدىڭ مىقتى دەگەن كاسىپكەرلەرىمىز بولدى. مەن ايتتىم، ءبارىڭىز وسى جەردە وتىرسىزدار، ال جولدىڭ ارعى بەتىندە WorldSkills چەمپيوناتى ءوتىپ جاتىر. وعان كىم باردى؟ كىم قولداۋ ءبىلدىردى؟ ەشكىمدى كورمەدىم دەدىم. بىرەڭ- ساران كومپانيالار عانا دەمەۋشىلىك جاسادى. كوبىسى - شاعىن كاسىپكەرلەر. بولدى. جيىندا بارلىق كاسىپكەرلەر قولداۋ ءبىلدىردى. كەلەسى جىلدان باستاپ بارلىق «اتامەكەن پالاتاسى WorldSkills قاۋىمداستىعىمەن جۇمىس ىستەيتىن بولادى، - دەدى ۇكىمەت باسشىسى باقىتجان ساعىنتايەۆ.
پرەمەر- مينيستر جەڭىمپازداردى دا ماراپاتتاپ، بارلىعىنا ساتتىلىك تىلەدى. ءبىرىنشى ورىن العانداردىڭ ءبارى كەلەسى جىلى قازان قالاسىندا وتەتىن الەمدىك دوداعا قاتىسادى.
ايتا كەتەيىك، جاقىندا ق ر پرەمەر- ءمينيسترى باقىتجان ساعىنتايەۆ "اتامەكەن" ۇ ك پ پرەزيديۋمىنىڭ كەڭەيتىلگەن وتىرىسىنا جينالعان كاسىپكەرلەردى سىنعا العان بولاتىن. "بۇگىن WorldSkills بويىنشا كەزەكتى چەمپيونات باستالدى. مەن ءوزىم بارىپ، كورىپ كەلدىم. ول جەردە كوللەدجدە وقيتىن جاستار ءوزارا سىنعا تۇسەدى. چەمپيونات تاعى ەكى كۇنگە جالعاسادى. سوسىن 7 سىندە جەڭىمپازداردى انىقتايمىز دا، الەمدىك چەمپيوناتقا بارامىز. مەن ءوزىم سول قاۋىمداستىقتى باسقارامىن. ماسەلەن، تيمۋر اسقار ۇلى ("اتامەكەن" ۇ ك پ پرەزيديۋم باسشىسى - اۆت. ) سپورتتىق قاۋىمداستىقتى باسقارسا، مەن وسى ۇيىمدى تاڭدادىم. سوعان پايدام ءتيىپ جاتىر دەپ ويلايمىن. ءوز باسىم ىلعي قولداۋ جاساپ وتىرامىن"، - دەدى ب. ساعىنتايەۆ.
ۇكىمەت باسشىسىنىڭ ايتۋىنشا، چەمپيوناتقا كوللەدجدەر وق بويى وزىق شاكىرتتەرىن الىپ كەلدى. ءبىراق ءدال وسىنداي شارالارعا وتاندىق كاسىپكەرلەر تاراپىنان مىقتى قولداۋ بايقالمايدى. بيزنەسمەندەر "كاسىبي ماماندار جوق" دەپ ءجيى ارىزدانادى. ال سول كاسىبي مامانداردى قولداۋعا كەلگەندە نەمقۇرايلىق تانىتىپ جاتادى. "مەن چەمپيوناتقا قولداۋ بىلدىرگەندەردى بايقاپ كوردىم. قۇرىلىس بويىنشا ءىرى كومپانيالاردىڭ ىشىندە BI Group پەن Knauf بولدى. باسقالارى قايدا؟ سىزدەر كورىنبەيسىزدەر عوي. قولداۋ قايدا؟ چەمپيوناتتا مەن ناعىز ەنتۋزياستاردى كوردىم. ولار كوپ پايدا تاپپاسا دا، ورتاق ىسكە جاناشىرلىق تانىتىپ وتىر. ءوز ماماندارىمىز كوتەرىلسىن دەپ تىلەيدى. ال وسى جەردە وتىرعانداردىڭ ىشىنەن مەن ەشكىمدى كورمەدىم. ءبىز كادر كەرەك، ءوز ماماندارىمىزدى دايىندايىق دەيمىز. سىزدەر وزدەرىڭىز قولداۋ جاساماساڭىزدار، ول مامانداردى قايدان الامىز؟ "، - دەپ اتاپ كورسەتتى ب. ساعىنتايەۆ.
