باۋىرجان بايبەك ءوز وتباسىنا تاعىلعان ايىپقا قاتىستى پىكىر ءبىلدىردى

استانا. قازاقپارات - بۇگىن ورتالىق كوممۋنيكاتسيالار قىزمەتىندەگى بريفينگتە الماتى اكىمى باۋىرجان بايبەك قالاداعى كولىك تۇراقتارىن وتباسى مۇشەلەرى يەلىك ەتەدى دەيتىندەرگە جاۋاپ بەردى، دەپ حابارلايدى قازاقپارات ءتىلشىسى.

«مەنىڭ وتباسىم تۇراقتارعا يەلىك ەتەدى دەگەن وسەك تاراتتى. مەنىڭشە، مۇنى زاڭدى جۇمىس ىستەگىسى كەلمەيتىندەر، لاي سۋدان بالىق اۋلاۋدى قالايتىندار شىعارىپ ءجۇر. وسى ارقىلى بىرەۋلەردىڭ اكىمدىككە قىسىم كورسەتۋگە ۇمىتتەنەتىندىگى، ونسىز دا كۇردەلى بولعانىمەن اسا قاجەتتى كولىك رەفورماسىن جۇرگىزدىرمەۋدى قالايتىندىعى انىق» ، - دەدى الماتى اكىمى.

ونىڭ اتاپ وتۋىنشە، كولىكتەردى قالا ورتاسىنان ىعىستىرىپ شىعارۋ ماسەلەسى وتكىر تۇر. سەبەبى قالانىڭ ەكولوگيالىق احۋالى كۇردەلەنە تۇسۋدە.

«بۇگىندە قالانىڭ اتموسفەراسىنا تاستالاتىن قالدىقتاردىڭ 70 پايىزى كولىكتەن بولىنەدى. ياعني، اكىم رەتىندە مەن 10 شارانىڭ 7 ەۋىن كولىككە باعىتتايمىن. سەبەبى زياندى قالدىقتاردىڭ 70 پايىزى سولارعا تيەسىلى. بۇل ەكولوگياعا، بالالارىمىزدىڭ، اتا- انالارىمىزدىڭ دەنساۋلىعىنا قاتىستى ماسەلەلەر» ، - دەدى باۋىرجان بايبەك.