سانكت- پەتەربۋرگتە ءاليا مولداعۇلوۆاعا ەسكەرتكىش قويىلادى

اقتوبە. قازاقپارات - اقتوبە وبلىسىنىڭ اكىمدىگى رەسەيدەگى قازاقستان ەلشىلىگىمەن بىرلەسىپ، سانكت- پەتەربۋرگتە ءاليا مولداعۇلوۆانىڭ ەسكەرتكىشىن ورناتادى.

 بۇل تۋرالى بۇگىن ەلباسىنىڭ «ۇلى دالانىڭ جەتى قىرى» ماقالاسىن ءتۇسىندىرۋ كەزىندە ايتىلدى، دەپ حابارلايدى قازاقپارات ءتىلشىسى.

اقتوبەگە ەلباسى نۇرسۇلتان نازاربايەۆتىڭ ماقالاسىن ءتۇسىندىرۋ توبى كەلدى. ولاردىڭ اراسىندا «ەگەمەن قازاقستان» رەسپۋبليكالىق گازەتى» ا ق باسقارما ءتوراعاسى دارحان قىدىرالى، «قازاقپارات» حالىقارالىق اقپارات اگەنتتىگىنىڭ باس ديرەكتورى اسقار ۋماروۆ، «قاسيەتتى قازاقستان» عىلىمي- زەرتتەۋ ورتالىعىنىڭ ديرەكتورى بەرىك ءابدىعالي، قوعام قايراتكەرى، ساياساتتانۋشى ايدوس سارىم، «قازاقستان بلوگەرلەرى اليانسى» قب ءتوراعاسى عالىم بايتۋك بار.

«وتكەن جىلى رەسەيدەگى قازاقستان ەلشىلىگىمەن بىرلەسىپ، رجيەۆ قالاسىنداعى مەموريالدىق كەشەن جاڭعىرتىلدى. ەلشىلىك پەن مينيسترلىك اراسىنداعى كەلىسىمگە سايكەس جۇمىس كەلەر جىلى جالعاسادى. ەندى تۆەر وبلىسىنداعى قازاقستاندىقتار جەرلەنگەن جەرگە دە ارنايى بەلگى قويىلادى. رەسەيدەگى قازاقستان ەلشىسى يمانعالي تاسماعامبەتوۆ سانك- پەتەربۋرگتە ءاليا مولداعۇلوۆانىڭ ەسكەرتكىشىن ورناتۋ يدەياسىن ايتتى. ءبىز قولداپ، كەلەر جىلى ءىستى باستايمىز» ، - دەدى وبلىس اكىمى بەردىبەك ساپاربايەۆ.

بۇعان دەيىن «رۋحاني جاڭعىرۋ» باعدارلاماسى اياسىندا «كيەلى جەرلەر گەوگرافياسى» جاسالىپ، وڭىرلەردە ءتىزىم جاسالدى. اقتوبە وبلىسى بويىنشا 10 جەر تىزىمگە ەندى.

««كيەلى جەرلەر گەوگرافياسى» - تاريحي سانا- سەزىمىمىزدى قالىپتاستىرۋعا، جاڭعىرتۋعا باعىتتالعان جۇمىس. اتا- بابامىز بارىپ، زيارات جاساپ جۇرگەن، ساياسي ماڭىزى بار ورىندار قوسىلدى. وتكەن جىلى «قاسيەتتى قازاقستاننىڭ» 1-تومى شىقتى. بيىل اقتوبە، اتىراۋ، ماڭعىستاۋ، باتىس قازاقستان وبلىستارى بويىنشا كىتاپ شىعادى. ەندى شەكارانىڭ ار جاعىندا، بويىندا جاتقان كيەلى جەرلەر ءتىزىمى جاسالادى. ماسكەۋ توڭىرەگىندەگى تاريحي جەرلەردى الساق، ارىنعازى حان كالۋگادا جەرلەنگەن. ناقتى ورنى بەلگىسىز بولسا دا، اۋماعى بار. سول جەرگە بەلگى، ەسكەرتكىش قويۋعا ۇسىنىس جاسايمىز. سونىمەن قاتار، تۆەر وبلىسىنىڭ ولەنينسكي اۋدانىندا 1 مىڭنان استام قازاق جەرلەنگەن جەر بار. ارنايى بەلگى قويۋ قاجەت دەپ ويلايمىز. مەكتەپ جانىندا 100, 101-اتقىشتار بريگاداسىنا مۋزەي اشىلعان. ءبىراق جاعدايى ءماز ەمەس. كومەكتەسىپ، قولداۋ كورسەتۋدى قاجەت ەتىپ تۇر» ، - دەدى «قاسيەتتى قازاقستان» عىلىمي- زەرتتەۋ ورتالىعىنىڭ ديرەكتورى بەرىك ءابدىعالي.