دەمالىس كۇندەرى قازاقستاندا كۇن جىلىنا باستايدى

استانا. قازاقپارات - قازاقستان اۋماعىنىڭ باسىم بولىگى ءسىبىر انتيتسيكلونىنىڭ ىقپالىندا تۇرعانىمەن، تروپوسفەراداعى اۋا اعىندارى باعىتىن سولتۇستىكتەن باتىسقا قاراي وزگەرتە باستادى، دەپ حابارلايدى قازاقپارات قازگيدرومەتكە سىلتەمە جاساپ.

سوندىقتان الداعى دەمالىس كۇندەرى اۋا تەمپەراتۋراسى كوتەرىلەدى.

بولجام جاسالىپ وتىرعان كەزەڭدە ورتالىق ازياعا جەرورتا تەڭىزىنىڭ شىعىس اۋداندارىنان قوزعالعان سيكلون جىلجىپ كەلەدى. سوعان بايلانىستى رەسپۋبليكانىڭ وڭتۇستىك-شىعىسىندا كۇن جاۋىن-شاشىندى بولىپ، تۇمان تۇسەدى، كوكتايعاق بولادى.

سونداي-اق قازاقستاننىڭ باتىسىندا دا جاۋىن-شاشىن بولادى، نەگىزىنەن، قار جاۋىپ، تۇمان تۇسەدى، كوكتايعاق بولادى، باسقا وڭىرلەرگە قاراعاندا، اۋا تەمپەراتۋراسى كۇرت تومەندەيدى.