شىعىس قازاقستاندىق بۇركىتشىسى حالىقارالىق بايقاۋدا توپ جاردى
الماتىعا التايدان ءبىر توپ بولىپ بارعان وبلىستىڭ بۇركىتشىلەرى ازيا چەمپيوناتىنان دا جۇلدەلى ورالىپ وتىر.
ايتا كەتسەك، «سونار 2018» بايقاۋىنا الەمنىڭ وننان استام ەلىنەن 90 بۇركىت قاتىسقان. ءۇرجارلىق ومىربەك نۇعىم ۇلىنىڭ «مۇزبالاعى» سول توقساننىڭ ىشىنەن توپ جاردى.
«ءبىزدىڭ وبلىستان ءتورت بۇركىت قاتىستى. ازيا بىرىنشىلىگىندە باس جۇلدەنى قىرعىزدار اكەتسە، حالىقارالىق بايقاۋدا ءبىزدىڭ مەرەيىمىز ۇستەم بولدى. ازيا بىرىنشىلىگىندە ءبىزدىڭ ءبىر بۇركىتىمىز ءتورتىنشى جانە توعىزىنشى ورىن الدى»، - دەيدى شىعىس-التاي بۇركىتشىلەر فەدەراتسياسىنىڭ پرەزيدەنتى تاتتىمبەك كاپ ۇلى.
حالىقارالىق سايىس «ەركىن ۇشىرۋ»، «شىرعاعا سالۋ»، «قويانعا سالۋ»، «تۇلكىگە سالۋ» سىندى كەزەڭدەردى قامتىعان. ومىربەك نۇعىم ۇلىنىڭ قىرانىنان بولەك تاتتىمبەك كاپ ۇلىنىڭ بۇركىتى ۇزدىك وندىقتى تۇيىندەسە، ەرزات بايقاداموۆ پەن ەرمەك جەتپىسوۆ باپتاعان مۇزبالاقتار شيرەك فينالعا دەيىن جەتكەن.