+7 (701) 759 90 19 Лента
-11 °С : استانا
-6 °С : الماتى
USD 371.56 EUR 422.43
RUB 5.56 CNY 53.51
جاڭالىقتار

امىرە قاشاۋبايەۆتىڭ پاريجدە العان كۇمىس مەدالى ۇلتتىق مۋزەيگە تاپسىرىلدى

7 جەلتوقسان 12:41 52
:ءبولىسۋ
امىرە قاشاۋبايەۆتىڭ پاريجدە العان كۇمىس مەدالى ۇلتتىق مۋزەيگە تاپسىرىلدى

استانا. قازاقپارات - قازاقستان رەسپۋبليكاسىنىڭ ۇلتتىق مۋزەيىندە «ۇلتتىق مۋزەيگە سىي تارتۋ» اكسياسىنىڭ ءۇش جىلدىق قورىتىندىسى بويىنشا كورمە ءوتتى، دەپ حابارلايدى قازاقپارات.

«ۇلتتىق مۋزەيگە سىي تارتۋ» اكسياسى ۇلتتىق مۋزەيدىڭ ءتول جوباسى رەتىندە 2015-جىلعى 18- ناۋرىزدان بەرى ءداستۇرلى تۇردە ۇيىمداستىرىلىپ كەلەدى.

مۇنىڭ نەگىزگى ماقساتى: ۇلتتىق تاريحي-مادەني مۇرالارىمىزدى ساقتاۋ ماسەلەسىنە قوعام نازارىن اۋدارۋ، ەل اراسىندا ەلەۋسىز جاتقان تاريحي ماڭىزى زور قۇندى زاتتاردى، ۇلتىمىزدىڭ ۇلى تۇلعالارىنىڭ جادىگەرلەرىن كاسىبي تۇرعىدا ساقتاۋ، كوپشىلىك نازارىنا ۇسىنۋ.

«ءۇش جىلدىق تاجىريبەدە كورسەتكەندەي، اكسيا ءوز ماقساتىنا جەتىپ، مۋزەي قورىن قۇندى جادىگەرلەرمەن تولىقتىرۋ تاراپىنان باعىتىمىز ايقىندالا ءتۇستى. ەل اراسىندا ەلەۋسىز جاتقان ءۇش مىڭعا جۋىق تاريحي مۇرالارىمىزدى، ۇلى تۇلعالارىمىزدىڭ قۇندى جادىگەرلەرىن جيناقتادىق. ءبىز ءار جادىگەردى كاسىبي دەڭگەيدە ساقتاۋعا كەپىلدىك بەرەمىز، ول ءۇشىن ۇلتتىق مۋزەيدە تولىق جاعداي بار. سونىمەن قاتار بۇل مۇرالار ءتۇرلى تاقىرىپتىق كورمەلەرگە ارقاۋ بولىپ، عىلىمي اينالىمعا تۇسەدى. وسى اكسيا ارقىلى ەلىمىزدىڭ رۋحاني بىرلىگىن ناسيحاتتاعىمىز كەلگەن. وسى ورايدا بەلسەندىلىك تانىتقان ءار ازاماتقا ايتار العىسىمىز شەكسىز»، - دەيدى ق ر ۇلتتىق مۋزەيى ديرەكتورىنىڭ ورىنباسارى اباي ساتىبالدين.

وسى ۋاقىتقا دەيىن اتالمىش شارا استانا، الماتى، قىزىلوردا، شىمكەنت، اقتوبە، قوستاناي، ورال، پەتروپاۆل، تاراز، تالدىقورعان قالالارىندا وتكىزىلدى. ءۇش جىلعا ۇلاسقان اكسياعا 300 دەن اسا جەكە تۇلعالار قاتىسىپ، ەلىمىزدىڭ باس مۋزەيىنىڭ قورىنا بارلىعى 3000 نان استام اسا قۇندى جادىگەر قابىلداندى. قورىتىندى كورمەگە 2015-جىلدان باستاپ بۇگىنگى تاڭعا دەيىنگى «ۇلتتىق مۋزەيگە سىي تارتۋ» اكسياسى بويىنشا جيناقتالعان قۇندى جادىگەرلەر قويىلدى.

شارا بارىسىندا، قازاقستاننىڭ ەڭبەك سىڭىرگەن ونەر قايراتكەرى، ايتىسكەر اقىن نادەجدا اندرەيەۆنا لۋشنيكوۆا:

«الايىن الدىمەنەن امانداسىپ،

وتىرعان ۇلكەن-كىشى زامانداسىم!

ۇلتتىق مۋزەي كورمەگە شاقىرعاندا،

ۇيىندە نادەجدا اقىن قالاي قالسىن»، - دەپ جىر شۋماعىن توگىلتە كەلە، «بالا بولسا، بەسىك تابىلادى»، دەمەكشى، مىنە ۇلتتىق مۋزەيدى قۇرىپ ەدىڭىزدەر، ەل-جۇرتتان تام-تۇمداپ قانشاما دۇنيە جيناقتالىپ جاتىر. مەن ايتىسقا تۇسكەندە العان شاپانىم تۇر ەكەن وسى كورمەدە. الماتىنىڭ تويىندا قاجىتاي دەگەن اقىنمەن ايتىسىپ، سوندا ولجاس سۇلەيمەنوۆتىڭ اناسى وسى شاپاندى سىيلاعان ەدى. مۋزەيدىڭ قورىنا تاپسىرىپ ەدىم، مىنە تورىندە تۇر. جان-جاقتان جينالعان مۇرالار قۇتتى بولسىن! ەلىمىز امان، ىرگەمىز بەرىك بولسىن!»، - دەگەن تىلەگىن ءبىلدىردى.

وسى شارا اياسىندا امىرە قاشاۋبايەۆتىڭ كۇمىس مەدالى ۇلتتىق مۋزەي قورىنا سالتاناتتى تۇردە تابىستالدى. امىرە قاشاۋبايەۆ - كونسەرتتىك ساپارمەن شەتەل اسىپ ونەر كورسەتكەن العاشقى قازاق: 1925-جىلى پاريج قالاسىندا كۇمىس مەدالگە يە بولعان. امىرەنىڭ بۇل ناگراداسىن وتانداسىمىز دجۋليا گاني 2016-جىلى قازاقستانعا تۇڭعىش رەت قالىڭ جۇرتشىلىقتىڭ نازارىنا ۇسىنىپ، «امىرە» فيلمىنىڭ باس پروديۋسەرى اليدار وتەمۇراتوۆتىڭ قولىنا تابىستاعان.


امىرە قاشاۋبايەۆتىڭ پاريجدە العان كۇمىس مەدالى ۇلتتىق مۋزەيگە تاپسىرىلدى

امىرە قازاقتىڭ تۇڭعىش كاسىبي تەاترىنىڭ ۇيىمداستىرىلۋىنا بەلسەنە ارالاسىپ، سول جەردە م. اۋەزوۆتىڭ «ەڭلىك-كەبەگىندە» جاپال قويشىنىڭ بەينەسىن سومدايدى. 1933-جىلى مۋزىكالىق ستۋديا قۇرىلىپ، العاشقىلاردىڭ ءبىرى بولىپ امىرە داۋسىن جازدىرعان.

بۇدان باسقا «دار» كومپانياسى مۋزەيدىڭ قورىنا اليدار وتەمۇراتوۆتىڭ «امىرە» فيلمىنە ارنايى جاسالعان ەكى دومبىرانى (رەكۆيزيت)، سونىمەن بىرگە 1925-جىلى پاريج قالاسىندا وتكەن حالىقارالىق انشىلەر كونكۋرسى تۋرالى ۇيىمداستىرۋشىلار مەن تىڭداۋشىلاردىڭ پىكىرلەرى مەن ماقالالارى جاريالانعان سول كەزدەگى گازەت قيىندىلارىنىڭ كوشىرمەلەرىن سىيعا تارتتى.

بۇل شاراعا مەملەكەت جانە قوعام قايراتكەرى د. ا. قونايەۆتىڭ جيەنى جاننەتا سەرىكبايەۆا، قازاقستاننىڭ ەڭبەك سىڭىرگەن ونەر قايراتكەرى، مايتالمان ايتىسكەر اقىن نادەجدا لۋشنيكوۆا، «امىرە» فيلمىندەگى باستى كەيىپكەردى سومداۋشى اكتەر سانجار ماديەۆ، سۋرەتشى ءابىلحان قاستەيەۆتىڭ شوبەرەسى ايسانىم قاستەيەۆا، اقىن تۇمانباي مولداعاليەۆتىڭ شاكىرتى اۋىت مۇحيبەك، ت. ب. قاتىستى.

ۇلتتىق مۋزەي باسشىلىعى اكسياعا ۇلەس قوسقان ازاماتتارعا ارنايى سىيلىقتار تابىستاپ، العىس حاتپەن ماراپاتتادى.


باستى سوزدەر: مادةنيةت,
:ءبولىسۋ

اأتور:

novasa

ونلاين قىزمەتكەرلەر
مۇراعات