ۋكراينا پارلامەنتى رەسەيمەن دوستىق جونىندەگى كەلىسىمدى توقتاتتى
«ۋكراينا مەن رەسەي فەدەراتسياسى اراسىنداعى دوستىق، ىنتىماقتاستىق جانە ارىپتەستىك جونىندەگى كەلىسىمدى توقتاتۋ تۋرالى» زاڭ جوباسىن 277 دەپۋتات قولداپ داۋىس بەردى.
زاڭ جوباسىن پارلامەنتكە 3- جەلتوقساندا ۋكراينا پرەزيدەنتى پەتر پوروشەنكو ۇسىنعان. وعان كەرچ بۇعازىندا رەسەي اسكەريلەرىنىڭ ۋكراينانىڭ ءۇش كەمەسىن اتقىلاپ، تۇتقىنداعانى سەبەپ بولعان. زاڭ جوباسى وسىعان بايلانىستى جەدەل قارالدى.
ۋكراينا سىرتقى ىستەر ءمينيسترى پاۆەل كليمكين ۋكراين ديپلوماتتارى وسى كەزگە دەيىن رەسەيمەن 48 كەلىسىمدى توقتاتقانىن، ەندى تاياۋ ۋاقىتتا تاعى 40 شاقتى كەلىسىمنىڭ كۇشى جويىلاتىنىن مالىمدەدى.
ۋكراينا مەن رەسەي اراسىنداعى دوستىق جانە ىنتىماقتاستىق جونىندەگى كەلىسىمگە 1997-جىلدىڭ 31- مامىرىندا سول كەزدەگى ەكى ەل پرەزيدەنتى لەونيد كۋچما مەن بوريس ەلتسين قول قويعان. كەلىسىم ون جىلعا (ودان ءارى وزدىگىنەن ۇزارا بەرەدى) ارنالعان. كەلىسىم 1999-جىلدىڭ 1- ساۋىرىنەن باستاپ كۇشىنە ەنگەن.
6- جەلتوقساندا ۋكراينا جوعارعى راداسى شەكاراشىلارعا ەل اۋماعىنا باسىپ كىرۋ قاۋپى تونگەن جاعدايدا ەسكەرتۋسىز وق اتۋعا رۇقسات بەردى.
«ازاتتىق»