گۇلشارا ءابدىقالىقوۆا: جاماندىق قىلساڭ پالە كۇت، بارىنە دە زاۋال بار
بۇل تۋرالى بۇگىن ەلوردادا ءوتىپ جاتقان «جاھاندانۋ جاعدايىندا جەمقورلىققا قارسى ءىس-قيمىل» اتتى حالىقارالىق كونفەرەنسيادا ق ر مەملەكەتتىك حاتشىسى گۇلشارا ءابدىقالىقوۆا ايتتى، دەپ حابارلايدى قازاقپارات ءتىلشىسى.
«مەملەكەت باسشىسى اعىمداعى جىلعى جولداۋىندا جەمقورلىقپەن بەلسەندى كۇرەس جۇرگىزىلەتىندىگىن باسا اتاپ ءوتتى. قازاقستان ب ۇ ۇ- نىڭ جەمقورلىققا قارسى كونۆەنتسياسىنىڭ ەرەجەلەرى مەن ۇلتتىق ەرەكشەلىكتەردى ەسكەرە وتىرىپ، حالىقارالىق ۇزدىك تاجىريبە نەگىزىندە جەمقورلىقتان ازات قوعام قۇرۋعا ۇمتىلاتىن زاماناۋي مەملەكەتتىڭ ءوزىنىڭ مودەلىن قۇردى. بەس ينستيتۋتتىق رەفورما مەن 2015-2025-جىلدارعا ارنالعان قازاقستاننىڭ جەمقورلىققا قارسى ستراتەگياسىنىڭ اياسىندا جەمقورلىققا قارسى ءىس-قيمىل جۇيەسىن جاڭعىرتۋدى جۇرگىزىپ جاتىر، زاڭنامالىق بازا قۇرىلدى»، - دەدى ول.
مەملەكەتتىك حاتشىنىڭ اتاپ وتۋىنشە، قازاقستان جەمقورلىققا قارسى ءىس-قيمىلدىڭ ۇلتتىق جۇيەسىن دامىتا وتىرىپ، جاھاندىق ترەندتەردى جانە دامىعان مەملەكەتتەر مەن حالىقارالىق بىرلەستىكتەردىڭ الدىڭعى قاتارلى تاجىريبەلەرىن ەسكەرەتىن بولادى. وسى رەتتە گۇلشارا ءابدىقالىقوۆا جەمقورلىققا قارسى ءىس-قيمىلدا جۇزەگە اسىرىلۋى ءتيىس نەگىزگى مىندەتتەردى اتادى.
«ءبىرىنشى - جەمقورلىقتىڭ كەز كەلگەن كورىنىسىنە نولدىك توزىمدىلىك احۋالىن قالىپتاستىرىپ، دامىتۋ، قوعامنىڭ قۇقىقتىق مادەنيەتىن ارتتىرۋ. ەكىنشى - مەملەكەتتىڭ، ازاماتتىق قوعامنىڭ جانە حالىقارالىق ۇيىمداردىڭ جان-جاقتى سەرىكتەستىگىن تەرەڭدەتۋ. ءۇشىنشى - مەملەكەتتىڭ ءتۇرلى قىزمەتتەرىندەگى جەمقورلىقتىڭ الدىن الۋ ءۇشىن مەملەكەتتىڭ، ۇ ە ۇ- لەردىڭ ءوزارا ءىس-قيمىلىن كەڭەيتۋ. قازاقتا: «جاماندىق قىلساڭ پالە كۇت، بارىنە دە زاۋال بار» دەگەن حالىق دانالىعى بار. مەنىڭشە، ءبىزدىڭ بارلىعىمىزدا دا ونى ەستە ۇستاپ، وسىناۋ افوريزمنەن تايماۋىمىز قاجەت»، - دەدى گۇلشارا ءابدىقالىقوۆا.
اۆتور: مارلان جيەمباي