گرۋزيادا مول ءوسىپ شىققان الما جينالماي قالدى

استانا. قازاقپارات - گرۋزيا تۇرعىندارى بيىل المانى اعاشتان جۇلىپ تەگىن جەي الادى. ويتكەنى جەمىستىڭ ءونىمى مول شىققان. بۇعان شارۋالار دا قارسى ەمەس. الما شىرىمەي، ەڭبەك زايا كەتپەسە بولعانى.

 گەلا جدولبورديدىڭ الما باعى 2 گەكتار جەردى الادى. بيىل بۇل جەمىستىڭ نارىقتاعى قۇنى كوك تيىن بولعاندىقتان ونداعان اعاشتان ءونىم جينالماي قالدى.

گەلا دجولبوردي، شارۋا:

- بيىل 15 توننا ءونىم الدىم. وتكەن جىلمەن سالىستىرعاندا 3 ەسە كوپ. ءبىراق باعا وتە ارزان. ءبىر كەلىسىنە 12-17 سەنت عانا تولەيدى. سوندا مەن شىعىنىمدى قالاي وتەيمىن؟ تىڭايتقىشتار مەن ۋلى حيميكاتتاردىڭ وزىنە عانا 1600 دوللار جۇمسادىم. ال ءونىمدى جيناپ الۋ ءۇشىن جۇمىسشىلارعا تولەپ، ودان قالدى جاشىكتەردى دە ساتىپ الۋىم كەرەك. ونىڭ ءوزى 1 دوللار 70 سەنت تۇرادى. ال بازاردا 20-25 كەلى ءبىر الما جاشىگى 2 دوللارعا دا تاتىماي تۇر. سوندىقتان ءونىمدى جيناۋدان پايدا جوق!

 فەرمەرلەر مول ونىمگە دايىن بولماعان جەرگىلىكتى بيلىكتى ايىپتاۋمەن الەك. ايتۋىنشا، المانى وزگە ەلگە وتكىزۋ ماسەلەسىن الدىن الا ويلاستىرماعاندىقتان شارۋالار اسا ۇلكەن شىعىنعا باتتى.

زۆياد بوبوكاشۆيلي، اۋىل شارۋاشىلىق مينيسترلىگى زەرتتەۋ ورتالىعىنىڭ قىزمەتكەرى:

 - مۇنداي جاعدايعا الدىن- الا دايىن بولۋ وڭاي ەمەس. سوڭعى ءۇش جىلدا گرۋزيا الما ەكسپورتتاۋشى ەمەس، كەرىسىنشە يمپورتتاۋشى ەل بولعان. ماسەلەن، 2016 جانە 2017 -جىلدارى بۇرشاق پەن اياز ءونىمدى قۇرتىپ جىبەرگەن. سوندىقتان ءىرى كولەمدى الما تۇسىمىنە ەلىمىز دايىن ەمەس. قازىر جەمىستى رەسەي، ۋكراينا مەن قازاقستانعا ەكسپورتتاۋ بويىنشا كەلىسسوزدەر ءجۇرىپ جاتىر. جوعارى ساپا مەن قىزىعارلىقتاي باعا ۇسىنىپ وتىرمىز.

 ماماندار 150 مىڭ تونناداي مول ءونىم ەلدە سوڭعى 25 جىلدا العاش رەت بولىپ وتىرعانىن ايتادى. سوڭعى جىلدارى 30 مىڭ توننادان اسپاعان. ال كونسەرۆى زاۋىتىندا جۇمىس تىنىمسىز ءجۇرىپ جاتىر. الداعى ۋاقىتتا المادان تابيعي تازا شىرىن، قويۋ توساپ پەن ءنارسۋلاردى ەكسپورتقا شىعارۋ جوسپاردا بار.

www.24.kz