باۋىرىن اۋىستىرعان ايەل ەكىنشى رەت بوساندى

الماتى. قازاقپارات - الماتى دارىگەرلەرى باۋىرىن اۋىستىرعان اسەم ساحاندى ەكىنشى رەت امان- ەسەن بوساندىرىپ الدى، دەپ حابارلايدى قازاقپارات ءتىلشىسى.

وسىدان بىرنەشە جىل بۇرىن 24 جاستاعى ايەلگە دارىگەرلەر باۋىر سيرروزى دەگەن قورقىنىشتى دياگنوز قويعان.

ۇزاققا سوزىلعان اۋرۋدان سوڭ دارىگەرلەر ونىڭ باۋىرىن اۋىستىرۋعا شەشىم قابىلدادى.

 2015 -جىلى ساۋىردە ا. سىزعانوۆ اتىنداعى ۇلتتىق عىلىمي حيرۋرگيا ورتالىعىندا ورتالىق ماماندارى ايەلدىڭ باۋىرىن اۋىستىردى.

اسەمنىڭ ءومىرى وتادان سوڭ كۇرت وزگەردى. دارىگەرلەر وعان ەكىنشى ءومىر سىيلادى دەسەك تە بولادى.

كوپ ۇزاماي كەلىنشەك جۇكتى بولىپ، 2016 -جىلدىڭ جەلتوقسانىندا تۇڭعىشىن بوساندى.

ارادا 1 جىلدان اسقاندا كوكتەمدە كەلىنشەك دارىگەرلەرگە تاعى دا جۇكتى ەكەندىگىن حابارلاعان. سودان بەرى كەلىنشەك دارىگەرلەردىڭ ءجىتى باقىلاۋىندا بولعان.

№17 ەمحانانىڭ دارىگەرلەرى ەكى جۇكتىلىك كەزىندە دە ۇلكەن تاۋەكەلدەرگە باس تىگىپ، اسەمدى امان- ەسەن بوساندىرۋعا بارىن سالدى.

«مەن ەرەسەك اداممىن، ءاربىر جۇكتىلىگىم مەنىڭ دەنساۋلىعىم ءۇشىن اسا قاۋىپتى بولعانىن ءتۇسىندىم. ەڭ الدىمەن وسى ەمحانانىڭ دارىگەرلەرىنىڭ كاسىبي بىلىكتىلىگىنە سەندىم. اپتا سايىن اناليز تاپسىردىم. ولار مەنەن ارى قوبالجۋدا بولدى. وسى كىسىلەردىڭ ارقاسىندا ەكىنشى رەت انا اتاندىم. ايگۇل ەسەنتاي قىزى، ۆيكتور ەدۋاردوۆيچ، گۋليارا قۇسايىن قىزىنا العىسىم شەكسىز» - دەدى اسەم.

№17 قالالىق ەمحانانىڭ باس دارىگەرىنىڭ ورىنباسارى ۆيكتور كيم باۋىرى جاقىندا اۋىستىرىلعان ادامنىڭ بالا كوتەرىپ، بوسانعانىن ەرەكشە جاعداي دەپ باعالادى.

«اسەم ءبىرىنشى رەت 2016 -جىلى بوسانعان. ونىڭ الدىندا 1 جىل بۇرىن عانا باۋىرى اۋىسقان بولاتىن. بۇل ءبىزدىڭ تاجىريبەمىزدەگى ءبىرىنشى جاعداي بولاتىن. بۇل جەردە وتە ۇلكەن قاۋىپ بولدى. باۋىر قانتالاۋى، يشەميا بولۋى مۇمكىن ەدى. ءتىپتى وتا جاسالعانىنا 1 جىل عانا بولعان باۋىر كەز كەلگەن ۋاقىتتا اعزاعا سىڭىسپەي قالۋى، بالادا جۇقپالى اۋرۋ تۋىنداۋى مۇمكىن ەدى. اسەمدى باقىلاۋعا ترانسپلانتولوگ، گاستروەنتەرولوگ، گەپاتولوگ، يممۋنولوگ، ينفەكتسيونيست مامانداردى جۇمىلدىردىق. كوكتەمدە تاعى دا جۇكتى ەكەنىن بىلگەندە، ارينە قارسى بولدىق. كەسار تىلىگىنەن سوڭ نەبارى 1,5 جىل وتكەن. بۇل بالا ءۇشىن دە، اناسى ءۇشىن دە ۇلكەن قاۋىپ بولدى»، - دەدى ۆيكتور كيم.

قازىر اناسى مەن بالاسىنىڭ دەنساۋلىعى قالىپتى. وتباسى نارەستەنى اسىعا كۇتىپ وتىر. جۇما كۇنى كەلىنشەك پەرزەنتحانادان شىعادى.

اۆتور: گۇلميرا  عوسمانالي