وزبەكستان تۇسىرگەن «ابايدىڭ قارا سوزدەرى» فيلمى كوپشىلىك نازارىنا ۇسىنىلادى

استانا.  قازاقپارات - الماتى قالاسىندا ورتالىق ازيا ەلدەرىنىڭ دەرەكتى فيلمدەر فورۋمى باستالدى. تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇيىمداستىرۋىمەن ءوتىپ جاتقان شاراعا وزبەكستان، تاجىكستان جانە قىرعىزستاننىڭ دەرەكتى فيلم سالاسىنداعى تانىمال ماماندارى قاتىسادى.

 فورۋم اياسىندا سوڭعى ەكى جىلدا تۇسىرىلگەن دەرەكتى فيلمدەر كورسەتىلىپ، تالقىلانادى. سونداي- اق 2017 -جىلى ۆەنەتسيا كينوفەستيۆالىندە «ەڭ ۇزدىك دەرەكتى فيلم» اتالىمىن جەڭىپ العان وزبەكستان رەجيسسەرى باحودىر يۋلداشيەۆتىڭ « ۇلىقبەك» كارتيناسى كوپشىلىك نازارىنا ۇسىنىلادى. ءار كەزەڭنىڭ شىنايى بەت- بەينەسىن سۋرەتتەيتىن دەرەكتى فيلمدەردىڭ ورتالىق ازيا كەڭىستىگىندەگى تىنىسىن، ماسەلەلەرى مەن دامۋ باعىتتارىن تالقىلايتىن فورۋم 3 كۇنگە سوزىلادى.

 شۋحرات ماحمۋدوۆ، رەجيسسەر /وزبەكستان/ - فورۋمدا ءبىز 5 دەرەكتى فيلم كورسەتەمىز. وزبەكستان پرەزيدەنتى كورشى ەلدەرمەن دوستاستىققا ۇلكەن ءمان بەرەدى. سوندىقتان شەكارالاس مەملەكەتتەردىڭ مادەني مۇرالارى تۋرالى فيلمدەر ءتۇسىرۋدى قولعا الدىق. سولاردىڭ ءبىرى - «ابايدىڭ قارا سوزدەرى». جاقىندا عانا تۇسىرىلگەن بۇل تۋىندىمىز قازاقستاندىق كورەرمەنگە العاش رەت كورسەتىلەدى.

www.24.kz