پوشتاعا كەلگەن كۇدىكتى حاتتاردى اشپاڭىزدار - ق ر ۇلتتىق قاۋىپسىزدىك كوميتەتى

استانا. قازاقپارات - ق ر ۇلتتىق قاۋىپسىزدىك كوميتەتى حاكەرلەردىڭ فيشينگ شابۋىلدارى تۋرالى ايتىپ بەردى، دەپ حابارلايدى قازاقپارات ءتىلشىسى.

اقپاراتتىق قاۋىپسىزدىك دەپارتامەنتىنىڭ ديرەكتورى سەرگەي جۋراۆليەۆتىڭ ايتۋىنشا، ەلەكتروندى پوشتاعا تۇسەتىن حاتتاردى مۇقيات قاراپ وتىرۋ قاجەت. سەبەبى ىشىندە حاكەرلەر جىبەرگەن حاتتار بولۋى ابدەن مۇمكىن. ونداي حاتتار اشىلسا، ارنايى ۆيرۋس ادامنىڭ بارلىق مالىمەتتەرىن «جيناپ الادى». سول ارقىلى بانك ەسەپ-شوتتارىنا كىرىپ، اقشانى دا ۇرلاپ كەتۋگە مۇمكىندىك بار.

«ماسەلەن، ۆيرۋستى حاتتاردى جاپپاي تاراتادى. ول كەزدە الاياقتار ادامداردىڭ ساۋاتسىزدىعىنا سەنىپ وتىرادى. سەبەبى بىلمەيتىن ادام حاتتى اشا سالادى. سوسىن ماقساتتى فيشينگ شابۋىل بولادى. وندايدا الدىمەن ادامنىڭ پسيحولوگيالىق بەت-بەينەسىن زەرتتەيدى. ونىڭ الەۋمەتتىك جەلىلەرى زەرتتەلەدى. ناقتى قانداي ىسپەن اينالىساتىنى جانە نەمەن اۋەستەنەنى قارالادى دا، حاتتىڭ مازمۇنى سوعان ساي جازىلادى. بۇنداي حاتتاردىڭ 80 پروتسەنتى اشىلادى. ءسويتىپ، كومپيۋتەرگە ارنايى ۆيرۋس تارالادى دا، ادامنىڭ بارلىق حات الماسۋلارىن باقىلاپ وتىرۋعا بولادى»، - دەدى س. جۋراۆليەۆ جۋرناليستەرگە بەرگەن سۇحباتىندا.

ماماننىڭ سوزىنە قاراعاندا، مەسسەندجەرلەر ارقىلى كەلەتىن حاتتاردان دا اباي بولعان ءجون.

«بىرىنشىدەن، بەلگىسىز بىرەۋدەن كەلگەن حابارلامالارعا جاۋاپ بەرمەڭىزدەر. ەكىنشىدەن، جەلىدە وتىرعاندا تەك دوستارىڭىزعا عانا سەنىڭىزدەر. ۇشىنشىدەن، مەملەكەتتىڭ كومەگىنەن قورىقپاڭىزدار. ءبىز كيبەرشابۋىلدارعا قارسى تۇرا الامىز»، - دەپ اتاپ كورسەتتى س. جۋراۆليەۆ.

ايتا كەتەيىك، ەلىمىزدە كيبەرقاۋىپسىزدىك سالاسىنداعى مامان تاپشىلىعى ماسەلەسى وزەكتى بولىپ تۇر. وسى سالادا جالاقىنىڭ مولشەرى 1500 - 3000 دوللارعا دەيىن بارادى. الايدا كاسىبي ماماندار از.

الداعى ۋاقىتتا «قازاقستاننىڭ كيبەرقالقانى» تۇجىرىمداماسى اياسىندا جاڭا اكادەميانى اشۋ جوسپارلانىپ وتىر.

ال ق ر ۇ ق ك شەكارا قىزمەتىندە اقپاراتتىق قاۋىپسىزدىك باتالونى قۇرىلادى.

بۇگىندە حاكەرلەر زەينەتكەرلەردىڭ اقشاسىن ۇرلاي باستادى.