رەسپۋبليكالىق «التىن توبىلعى» ادەبي بايقاۋىنىڭ جەڭىمپازدارى انىقتالدى

 استانا. قازاقپارات - ەلورداداعى نازاربايەۆ ورتالىعىندا «التىن توبىلعى» رەسپۋبليكالىق ادەبي بايقاۋى قورىتىندىلاندى، دەپ حابارلايدى قازاقپارات ءتىلشىسى.

بايقاۋعا ءتۇرلى جانردا قالام تەربەپ جۇرگەن 18-35 جاس ارالىعىنداعى قالامگەرلەر قاتىستى.

ق ر تۇڭعىش پرەزيدەنتى - ەلباسىنىڭ قورى جاس ادەبيەتشىلەردىڭ ەڭبەگىنە وسىمەن ءتورتىنشى رەت قولداۋ كورسەتىپ وتىر. جىلدان جىلعا بايقاۋعا دەگەن قىزىعۋشىلىق ارتىپ كەلەدى.

 بيىلعى بايگەگە ەلدىڭ تۇكپىر- تۇكپىرىنەن 108 شىعارما كەلىپ تۇسكەن. جەڭىمپازدار «جىلدىڭ ۇزدىك پروزاسى» ، «جىلدىڭ ۇزدىك پوەزياسى» ، «جىلدىڭ بالالارعا ارنالعان ۇزدىك شىعارماسى» ، «جىلدىڭ ۇزدىك دراماتۋرگياسى» ءداستۇرلى اتالىمدار بويىنشا بەلگىلەندى. ءار نوميناتسيا بويىنشا سىياقى قورى 1 ميلليون تەڭگەنى قۇرايدى.

 سونىمەن قاتار بايقاۋ استانانىڭ مەرەيتويىنا ارنالعان «استانانىڭ 20 جىلدىعى» تاقىرىبىنا ارنالعان ۇزدىك ادەبي تۋىندى» ارنايى اتالىممەن تولىقتى. ونىڭ جۇلدە قورى 1,5 ميلليون تەڭگە.

 «بۇگىن ۇزدىك شىعارمالاردىڭ اۆتورلارى كىم ەكەنى جاريالانادى. بۇل بايقاۋعا قاتىسقان بارلىق اقىن- جازۋشىلارعا العىس بىلدىرەمىز. سول سەبەپتى ۇزدىكتەردى تاڭداۋ وتە قيىن بولدى. جىل سايىن «التىن توبىلعى» بايقاۋى بىزگە قازاقستاندىق جاڭا اقىندار مەن جازۋشىلاردى تانىتىپ كەلەدى. بۇل ءوز كەزەگىندە جاستار مەن قوعام اراسىندا قازىرگى زامانعى ادەبيەتتى وقۋعا ىنتالاندىرۋعا، جاڭا بۋىن اۆتورلارىنىڭ جارقىن وكىلدەرىن انىقتاۋعا ىقپال ەتەدى. ءبىز باستى قۇندىلىق دەپ وسىنى سانايمىز. بايقاۋ اتالىمدارى بەلگىلى ءبىر دارەجەدە ەلباسىنىڭ «ۇلى دالانىڭ جەتى قىرى» ماقالاسىندا ايتىلعان حالقىمىزدىڭ رۋحاني قۇندىلىقتارىن ايشىقتايدى. سول سەبەپتى ۇلتىق مادەنيەتتى، تاريحتى جانە ەل جەتىستىكتەرىنە ارنالعان شىعارماشىلىق جۇمىستاردى بىرىكتىرىپ، جاڭا اتالىمدى قوسۋ مۇمكىندىگى قاراستىرىلۋدا» ، - دەدى بايقاۋدىڭ ماڭىزدىلىعى مەن قازاق ادەبيەتىن دامىتۋعا قوساتىن ۇلەسىنە توقتالعان تۇڭعىش پرەزيدەنت قورىنىڭ اتقارۋشى ديرەكتورى قانات جۇمابايەۆ.

وسىلايشا، «جىلدىڭ ۇزدىك پروزاسى» اتالىمىندا «اداسقاندار» شىعارماسىمەن ايزات راقىشيەۆا ۇزدىك شىقتى. «جىلدىڭ ۇزدىك پوەزياسى» اتالىمى بويىنشا قايسار قاۋىمبەك («كۇڭىرەنبە، مولالار» ) جانە ايبول يسلامعاليەۆ («جالعىزدىق كارتيناسى» ) قاتار جەڭىمپاز اتاندى. «جىلدىڭ بالالارعا ارنالعان ۇزدىك شىعارماسى» اتالىمىندا الينا گاتينا توپ جارسا، «استانانىڭ 20 -جىلدىعى» تاقىرىبىنا ارنالعان ۇزدىك ادەبي تۋىندى» اتالىمىنىڭ يەگەرى بولىپ شەرحان تالاپ («استانا بوياۋلارى» ) تانىلدى.

بيىل «جىلدىڭ ۇزدىك دراماتۋرگياسى» اتالىمى بويىنشا ۇسىنىلعان جۇمىستاردىڭ قويىلعان تالاپتارعا ساي كەلمەۋىنە بايلانىستى، جەڭىمپاز انىقتالعان جوق.

  سونداي- اق «جىلدىڭ ۇزدىك پروزاسى» اتالىمى بويىنشا تۇرسىنبەك باشاروۆقا («چيريمە» ) جانە «جىلدىڭ بالالارعا ارنالعان ۇزدىك شىعارماسى» اتالىمىندا اقان مارعۇلانعا («جەتىقاراقشى» ) كوتەرمەلەۋ سىياقىسى رەتىندە 500 مىڭ تەڭگەدەن بەرىلدى.