باقىتجان ساعىنتايەۆ قىتاي ارقىلى قايدا شىعۋعا مۇمكىندىك بارىن ايتتى
«قازىر بارلىق نارىقتار اشىلىپ جاتىر. اسىرەسە، قىتايدىڭ ۇلكەن نارىعىن ەرەكشە اتاپ وتكەن ءجون. قىتاي ۇكىمەتى تاراپىنان دا ۇسىنىستار بولدى. ولار بىرلەسكەن كاسىپورىنداردى قۇرۋ ارقىلى قازاقستاندىق ونىمدەردى باسقا ەلدەرگە جەتكىزۋگە بولادى دەيدى. بۇل دەگەنىمىز، وتاندىق كاسىپكەرلەر قىتايلىق ارىپتەستەرىمەن بىرلەسىپ، قىتاي ارقىلى وڭتۇستىك ازياعا شىعا الادى. ابىلاي يسابەك ۇلى (اتامەكەننىڭ باسقارما ءتوراعاسى - اۆت. )، وسى ماسەلەنى جاقسى بىلەدى. سوندىقتان وسى مۇمكىندىكتى ءساتتى پايدالانامىز دەگەن ءۇمىت بار»، - دەدى ب. ساعىنتايەۆ «اتامەكەن» ۇ ك پ پرەزيديۋىمىنىڭ كەڭەيتىلگەن وتىرىسىندا.
ۇكىمەت باسشىسىنىڭ ايتۋىنشا، بۇگىندە قازاقستاندىق كاسىپكەرلەر ءبىراز ونىمدەرىن قىتايدىڭ وزىنە تاسىمالداي المايدى. دەگەنمەن، ول تاۋارلاردى وسى مەملەكەت ارقىلى وڭتۇستىك ازياعا شىعارۋعا ابدەن بولادى.
ايتا كەتەيىك، كۇنى كەشە ۇكىمەت وتىرىسىندا دا وتاندىق ونىمدەردى قىتايعا تاسىمالداۋ ماسەلەسى قارالدى.
ق ر اۋىل شارۋاشىلىعى ۆيتسە- ءمينيسترى ارمان ەۆنيەۆتىڭ ايتۋىنشا، بۇگىنگى تاڭدا بالىق، اسىل تۇقىمدى جىلقىلار، قوي ەتى، بال، بيداي، بيداي كەبەگى، سويا بۇرشاعى، راپس، سيىر ەتى، جوڭىشقا، ۇن، وسىمدىك مايى، ارپا مەن جۇگەرى ءۇشىن قىتاي نارىعى اشىق.
«وسىنىڭ ارقاسىندا 9-ايدىڭ ىشىندە قازاقستاننان قىتاي ەلىنە اۋىل شارۋاشىلىعى ونىمدەرىنىڭ ەكسپورتى 42 پروتسەنتكە ۇلعايدى. يران تاراپىنان ءتىرى قويدى، توڭازىتىلعان جانە سالقىنداتىلعان قوي ەتىن، سيىر ەتىن، تاعامدىق جۇمىرتقانى جەتكىزۋگە ارنالعان ۆەتەريناريالىق تالاپتار كەلىسىلدى. بيىل ءتىرى ءىرى قارا مالعا قويىلاتىن تالاپتاردى كەلىسۋ جوسپارلانىپ وتىر. سونداي- اق، ءىرى قارا جانە ۇساق مالدى ساۋد ارابياسىنا، ال ەت پەن ەت ونىمدەرىن، تاۋىق جۇمىرتقاسىن بىرىككەن اراب امىرلىكتەرىنە جەتكىزۋگە قاتىستى شەكتەۋلەر الىنىپ تاستالدى»، - دەپ اتاپ كورسەتتى ا. ەۆنيەۆ.