ۇكىمەت باسشىسى قىتاي نارىعىنا شىعۋدىڭ جولىن كورسەتتى
ۇكىمەت باسشىسىنىڭ ايتۋىنشا، بۇگىندە مەملەكەت تاراپىنان ەكسپورتتى ۇيىمداستىرۋ بويىنشا بارلىق شارالار اتقارىلىپ كەلەدى. ەندى، بيزنەستىڭ ءوزى ارەكەت ەتۋى كەرەك.
«ماسەلەن، مەن قىتايدا بولعاندا قازاقستاندىق تاۋارلارعا سۇرانىس بەر دەدى. ءبىراق ول تاۋارلاردىڭ قاپتاماسى سايكەس كەلمەيدى ەكەن. قىتاي جاقتا تۇتىنۋشىلار قاپتامانى جىلتىراق كۇيىندە مە، باسقا ءبىر تۇردە مە، ءبىر سوزبەن ايتقاندا قاپتاماعا قاتىستى وزدەرىنىڭ ناقتى ءبىر تالاپتارى بار. ال ءبىزدىڭ كاسىپكەرلەرىمىز ونى جاسامايدى. سودان قىتاي نارىعىنا شىعا الماي جۇرەسىزدەر. نەگىزى، وسى ماسەلەنى بىرلەسىپ شەشۋ كەرەك ءتارىزدى. ءبىز ءوز تاراپىمىزدان قولداۋ جاساۋعا دايارمىز»، - دەدى ب. ساعىنتايەۆ «اتامەكەن» ۇ ك پ پرەزيديۋمىنىڭ كەڭەيتىلگەن وتىرىسىندا.
پرەمەر-ءمينيسترىنىڭ ويىنشا، ناقتى ءبىر برەندتى جاساۋعا بولادى. ول ارقىلى شەتەلدىڭ نارىعىنا شىعۋعا بولادى.
ايتا كەتەيىك، وتىرىس كەزىندە باقىتجان ساعىنتايەۆ كاسىپكەرلەردى كورشى قىتاي ارقىلى وڭتۇستىك ازيا ەلدەرىنە شىعۋعا ۇندەدى.
«قازىر بارلىق نارىقتار اشىلىپ جاتىر. اسىرەسە، قىتايدىڭ ۇلكەن نارىعىن ەرەكشە اتاپ وتكەن ءجون. قىتاي ۇكىمەتى تاراپىنان دا ۇسىنىستار بولدى. ولار بىرلەسكەن كاسىپورىنداردى قۇرۋ ارقىلى قازاقستاندىق ونىمدەردى باسقا ەلدەرگە جەتكىزۋگە بولادى دەيدى. بۇل دەگەنىمىز، وتاندىق كاسىپكەرلەر قىتايلىق ارىپتەستەرىمەن بىرلەسىپ، قىتاي ارقىلى وڭتۇستىك ازياعا شىعا الادى. ابىلاي يسابەك ۇلى (اتامەكەننىڭ باسقارما ءتوراعاسى - اۆت. )، وسى ماسەلەنى جاقسى بىلەدى. سوندىقتان وسى مۇمكىندىكتى ءساتتى پايدالانامىز دەگەن ءۇمىت بار»، - دەپ اتاپ كورسەتتى ب. ساعىنتايەۆ.