كورەيادان جۇمىس تاۋىپ بەرەمىن دەپ ەلدى الداعان ايەل ۇستالدى

 الماتى. قازاقپارات - الماتى پوليتسياسى وڭتۇستىك كورەيادان جۇمىس تاۋىپ بەرەمىن دەپ ونداعان ادامدى الداپ، اقشاسىن قولدى ەتكەن ايەل ۇستالدى، دەپ حابارلايدى قازاقپارات ءتىلشىسى.

قالالىق پوليسيا دەپارتامەنتىنىڭ حابارلاۋىنشا، 29 جاستاعى دينا قۇرمانوۆا ادامدارعا ءوزىن ىسكەر ايەل رەتىندە تانىستىرعان. سوسىن، وڭتۇستىك كورەيادان جاقسى جۇمىس تاۋىپ بەرەمىن دەپ الداعان. ول ءۇشىن ايەل قوماقتى اقى تالاپ ەتكەن.

قازىر اتالعان دەرەككە سايكەس مەدەۋ اۋداندىق ءى ءى ب سوتقا دەيىنگى تەرگەۋ جۇمىستارى ءجۇرىپ جاتىر.

«ايەل جۇمىس بەرۋ تۋرالى جارنامانى «Оlx.kz پورتالىنا جاريالاعان. وعان ادامدار حابارلاسا باستاعان. دينا سول ادامدارمەن كەزدەسىپ، ءوزىن ىسكەر ايەل رەتىندە تانىستىرىپ، الدىن الا اقشالارىن الىپ كەتىپ وتىرعان. ايەل ولاردى كۇنىنە 80 دوللار قارجى تاباسىز دەپ الداعان. وعان سەنگەندەردىڭ كوپشىلىگى جۇمىسىنان شىعىپ كەتكەن. كەيىن كورسەتكەن عاجاپ فوتولارى مەن ۆيدەولارىنىڭ بارلىعى ينتەرنەتتەن جۇكتەلىپ الىنعانى بەلگىلى بولدى. ەڭ اقىرىندا ول تەلەفونىن ءوشىرىپ، زىم- زيا جوق بولىپ كەتكەن. ءبىر جاعدايدا قۇرمانوۆا ءبىر كليەنتىنەن تولىعىمەن ورنالاسۋ ءۇشىن 1 ميلليون 400 مىڭ تەڭگە العان» ، - دەدى مەدەۋ اۋداندىق ىشكى ىستەر باسقارماسىنىڭ باسشىسى بولات توتىبايەۆ.

وسىعان بايلانىستى پوليتسيا دينا قۇرمانوۆانىڭ ءىس- ارەكەتىنەن زارداپ شەككەن ادامدار بولسا، 2544802؛ 87026199997, 102 نومىرلەرىنە حابارلاسۋىن سۇرايدى.