قىتايدا «قازاق جاۋىنگەرى» اتىمەن تانىلعان قانداسىمىز اتا-جۇرتتا العاشقى ايقاسىن وتكىزەدى
قىتايداعى جەكپە-جەك كەشتەرىندە «قازاق جاۋىنگەرى» لاقاپ اتىمەن شارشى الاڭعا شىعىپ جۇرگەن قازاق بوكسشى ەلشات نىعماتوللا ۇلى (14-0-1، 5 ك و) قازاقستاننىڭ تاۋەلسىزدىك كۇنى مەرەكەسىنە وراي استاناداعى «داۋلەت» سپورت كەشەنىندە وتەتىن كاسىپقوي بوكس كەشىندە سىنعا تۇسەدى.
ەلشات نىعماتوللا ۇلى 53,5 كەلى سالماقتا جۇدىرىقتاسادى. ول الەمدىك رەيتينگتەگى ەڭ مىقتى 100 بوكسشىنىڭ قاتارىنا كىرگەن. ال قىتايدا ءوز سالماعىنىڭ كوشىن باستاپ تۇر. سونداي-اق وسىعان دەيىن WBO تۇجىرىمى بويىنشا قىتاي چەمپيونى جانە WBC تۇجىرىمى بويىنشا ازيا چەمپيونى اتاعىنا قول جەتكىزىپ ۇلگەرگەن تاجىريبەلى بوكسشىلاردىڭ ءبىرى.
قانداسىمىز قازىر ەلوردادا وتەتىن جەكپە-جەك كەشىنە الماتى قالاسىندا دايىندالىپ جاتىر. بۇل ونىڭ اتا-جۇرتتاعى العاشقى ايقاسى بولماق.
ەسكە سالا كەتەيىك، استانادا وتەتىن كاسىپقوي بوكس كەشى قازاقتىڭ بەلگىلى بوكسشىسى قانات يسلام قۇرعان «QAZAQ promotions» پروموۋتەرلىك كومپانياسىنىڭ ۇيىمداستىرۋىمەن وتەدى.
وندا قانداسىمىز ەلشات نىعماتوللا ۇلىمەن قاتار ايدار شارىبايەۆ، اسحات ءۋاليحانوۆ، ابىلايحان قۇسايىنوۆ جانە رۋسلان مىرساتايەۆتىڭ شارشى الاڭعا شىعاتىنى تۋرالى وسىعان دەيىن جازعان بولاتىنبىز.
اۆتور: كۇنسۇلتان وتارباي