ديماش قۇدايبەرگەن «الەم ارۋى» بايقاۋىنا ءوز ەسىمىن يەلەنگەن ۇشاقپەن بارادى

استانا. قازاقپارات - ديماش قۇدايبەرگەن قىتايداعى «الەم ارۋى-2018» بايقاۋىنا ءوز ەسىمىن يەلەنىپ، سۋرەتى جاپسىرىلعان ۇشاقپەن بارادى، دەپ حابارلايدى قازاقپارات.

بۇل تۋرالى ءانشى ينستاگرامداعى پاراقشاسىندا جاريالادى.

وزدەرىڭىزگە بەلگىلى، ديماش 8- جەلتوقسان كۇنى سانيا قالاسىندا وتەتىن «الەم ارۋى-2018» حالىقارالىق بايقاۋىنىڭ فينالىندا ونەر كورسەتەدى. سونداي-اق، قازاقستان اتىنان قاتىساتىن ەكاتەرينا دۆورەتسكاياعا قولداۋ كورسەتەدى.

«الەم ارۋىندا» كەزدەسكەنشە!» دەپ جازدى ديماش قۇدايبەرگەن ءوز پاراقشاسىندا. ءسويتىپ، جازبامەن بىرگە ءوز سۋرەتى جاپسىرىلعان ۇشاقتىڭ فوتوسىن جاريالادى.

بۇل ەرەكشە ۇشاق تۋرالى قازاقپارات كەزىندە جازعان- دى. «TianDao» جانە «Eastern company»  كومپانيالارى بىرلەسىپ، ديماش ساۋندترەك جازعان «Moonlight blade» ونلاين ويىنىنا ارنالعان ۇشاقتى پايدالانۋعا بەرگەن بولاتىن. ۇشاقتا ديماش قۇدايبەرگەننىڭ فوتوسى بەينەلەنگەن.