اۋىل مۇعالىمدەرىنە كوممۋنالدىق قىزمەت ءۇشىن بەرىلەتىن وتەماقى رەتتەلەدى

استانا. قازاقپارات - قازاقستان رەسپۋبليكاسى ءبىلىم جانە عىلىم قىزمەتكەرلەرى كاسىپوداعى ءتوراعاسىنىڭ ورىنباسارى ايگۇل مۇقاشەۆا «پەداگوگتار مارتەبەسى تۋرالى» زاڭ جوباسىنا ەنگىزىلگەن ۇسىنىستار تۋرالى ايتىپ بەردى، دەپ حابارلايدى قازاقپارات ءتىلشىسى.

«ءبىز، ءبىلىم قىزمەتكەرلەرى كاسىپوداعىنىڭ وكىلدەرى رەتىندە كاسىپوداق مۇشەلەرىنەن 300-دەن استام ۇسىنىس قابىلدادىق. جۇمىس توبىنا ۇسىنعانىمىزدا بارلىق باستامالار قولداۋ تاپتى. جۇمىس توبى ق ر پرەزيدەنتى ءبىلىم جانە عىلىم مينيسترلىگىنە تاپسىرما بەرگەننەن كەيىن بىردەن جۇمىسىن باستادى. قازىرگى تاڭدا جۇمىس توبىندا 48 ادام جۇمىس ىستەيدى. بۇل زاڭ جوباسى عانا، ياعني زاڭنىڭ سوڭعى نۇسقاسىن بىلدىرمەيدى. ءقازىر ول تولىقتىرىلىپ، پىسىقتالىپ جاتىر»، - دەدى ول ق ر ءبىلىم جانە عىلىم مينيسترلىگىندە وتكەن باسقوسۋدا.

ونىڭ ايتۋىنشا، ءتيىمدى زاڭدى قابىلداۋ ءۇشىن ءاربىر قازاقستاندىقتىڭ اتالمىش زاڭ جوباسىنا ءۇن قوسقانى ماڭىزدى.

«مۇعالىمنىڭ يگىلىگى ءۇشىن ءبارىمىز دە اتسالىسىپ، زاڭدى بىرگە تالقىلاۋىمىز كەرەك. بۇل زاڭ ماجىلىستە تالقىلانعاننان كەيىن عانا قابىلدانادى. مەن سونداي-اق ءبىزدىڭ قۇرمەتتى ۇستازدار قاۋىمى مەن اتا- انالارعا جۇمىسقا بەلسەندى قاتىسىڭىزدار، ءوز ۇسىنىستارىڭىزدى جىبەرىڭىزدەر دەپ ايتقىم كەلەدى»، - دەيدى ول.

زاڭ جوباسىنىڭ شەڭبەرىندە ناقتى ۇسىنىستار تۋرالى ايتقان ايگۇل مۇقاشەۆا ءبىلىم بەرۋ پروتسەسىندە ماتەريالدىق جاعىنان قامتاماسىز ەتۋ، مۇعالىمدەردىڭ الەۋمەتتىك كەپىلدىكتەرى تۇرعىسىنان كوپتەگەن ۇسىنىستار كەلىپ جاتقانىن اتاپ ءوتتى.

«مۇنىڭ ءبارىن ءبىز جۇمىس توبىنىڭ قاراۋىنا شىعاردىق. قازىر بارلىق ۇسىنىستار زاڭ جوباسىندا بار. الەۋمەتتىك كەپىلدىكتەر تۋرالى ايتار بولساق، «ءبىلىم تۋرالى» قازاقستان رەسپۋبليكاسىنىڭ قازىرگى زاڭىنداعى مۇعالىمنىڭ مارتەبەسى تۋرالى 7 تاراۋ تولىق دەڭگەيدە جۇمىس ىستەمەي تۇر. سەبەبى، الەۋمەتتىك كەپىلدىكتەر جەرگىلىكتى اتقارۋشى ورگانداردىڭ قاراۋىنا بەرىلگەن»، - دەيدى ايگۇل مۇقاشەۆا.

كاسىپوداق وكىلىنىڭ ايتۋىنا قاراعاندا، اۋىلدى جەرلەردە جۇمىس ىستەيتىن مۇعالىمدەر ءۇشىن - كوممۋنالدىق قىزمەتتەردى وتەۋ، قالالارداعى مۇعالىمدەرمەن سالىستىرعاندا 25 پايىزعا جوعارى جالاقى بەرۋ جەڭىلدىكتەرى بار.

«بۇكىل قازاقستان بويىنشا اۋىل مۇعالىمدەرىنە قالاداعىدان گورى 25 پايىز ارتىق اقشا بەرۋ ورىندالعانىمەن، كوممۋنالدىق جانە مەديتسينالىق قىزمەتتەرگە قاتىستى جەڭىلدىكتەر تولىق ورىندالدى دەپ ايتا المايمىز. ماسەلەن، الماتى مەن قىزىلوردا وبلىستارىندا مۇعالىمدەر ءوز قاراجاتى ەسەبىنەن مەديتسينالىق تەكسەرۋدەن وتەدى، سەبەبى جەرگىلىكتى بيۋدجەتتە بۇل ءۇشىن قاراجات قاراستىرىلماعان»، - دەيدى ول.

ايگۇل مۇقاشەۆا وتەماقى تۇرعىسىنان سولتۇستىك قازاقستانداعى مۇعالىمدەردىڭ ماسەلەلەرىن دە اتادى.

«سولتۇستىك قازاقستاندا تۇراتىن مۇعالىمدەردى الاتىن بولساق، ولاردىڭ وتەماقىسىنىڭ مولشەرى بار- جوعى 1300 تەڭگە عانا. مۇندا مۇعالىمگە 1,3 مىڭ تەڭگە بەرىلەدى دە، ال كومىردىڭ تونناسى 18 مىڭنان 24 مىڭ تەڭگەگە دەيىن بولادى. بۇل ماسەلەنى بىرنەشە رەت كوتەرگەن ەدىك. مەنىڭ ويىمشا، كوممۋنالدىق قىزمەتتەر ءۇشىن وتەماقى مۇعالىمدەر تۇراتىن وبلىستىڭ ايماقتىق ەرەكشەلىكتەرىنە قاراي بەرىلۋى كەرەك»، - دەپ قورىتىندىلادى ول.

ەسكە سالا كەتسەك، مەملەكەت باسشىسى نۇرسۇلتان نازاربايەۆ قازاقستان حالقىنا جولداۋىندا 2019 -جىلى قازاقستاندا «پەداگوگتاردىڭ مارتەبەسى» تۋرالى زاڭ قابىلداۋ كەرەكتىگىن ايتقان ەدى.

ايتا كەتەرلىگى، ب ع م- داعى بۇگىنگى باسقوسۋدا زاڭ جوباسى بويىنشا ەڭبەك ەتىپ جاتقان جۇمىس توبى مۇعالىمدى مىندەتىنەن تىس جۇمىسقا تارتقانداردى اكىمشىلىك جاۋاپكەرشىلىككە تارتۋدى ۇسىندى.