جوعارعى سوتتا بالا تاربيەسىندەگى داۋلاردى شەشۋ ماسەلەسى تالقىلاندى
وتىرىستىڭ كۇن تارتىبىنە سايكەس، جوعارعى سوتتىڭ ءتورت نورماتيۆتىك قاۋلىسىنىڭ جوباسى تالقىلاندى. جوعارعى سوتتىڭ سۋدياسى زاۋرە كەيكىباسوۆا «سوتتاردىڭ بالالاردى تاربيەلەۋگە بايلانىستى داۋلاردى شەشۋ كەزىندە زاڭنامانى قولدانۋى تۋرالى» نورماتيۆتىك قاۋلى جوباسىمەن تانىستىردى.
«ءبىز «تاربيەلەۋ» ءسوزىن تار ماعىنادا تۇسىنبەۋىمىز كەرەك. بالالارعا قاتىستى داۋلاردى شەشە وتىرىپ، ءبىز ولاردىڭ دۇنيەتانىمى مەن بولاشاعىنا عانا ەمەس، حالقىمىزدىڭ كەلەشەگىنە دە ىقپال ەتەمىز»، - دەيدى ول.
زاۋرە كەيكىباسوۆا قانداي جاعدايلاردا اتا-انا قۇقىقتارىنان شەكتەۋ جانە اليمەنت وندىرۋدەن باس تارتۋ شاراسى قولدانىلاتىنىن، اتا-اناسىنىڭ ءبىرى تۇراقتى تۇرۋ ءۇشىن قازاقستاننىڭ شەگىنەن تىس كەتەتىن بالالاردىڭ تۇرعىلىقتى جەرىن انىقتاۋ تۋرالى ىستەردى قاراۋ كەزىندە تۋىندايتىن كەيبىر ماسەلەلەر تۋرالى ايتىپ بەردى.
ال جوعارعى سوتتىڭ سۋدياسى سارا جارمۇحامبەتوۆا «سوتتاردىڭ بالانىڭ تۋۋ تەگىن انىقتاۋعا بايلانىستى ىستەردى قاراۋى كەزىندە زاڭنامانى قولدانۋى تۋرالى» نورماتيۆتىك قاۋلى جوباسىن تىلگە تيەك ەتتى. ول ءوز اتا- اناسىن ءبىلۋ قۇقىعى بالانىڭ قۇقىقتارى تۋرالى كونۆەنتسيادا بەكىتىلگەنىن اتاپ ءوتتى. بالا ءوزىنىڭ بيولوگيالىق اتا-اناسىن بىلۋگە، وتباسىندا تۇرۋعا جانە تاربيەلەنۋگە قۇقىلى. سۋديا اتاپ وتكەندەي، ەر ادامنىڭ اكەلىگىن مويىنداۋ ەرىكتى تارتىپتە بالانىڭ اناسىنىڭ كەلىسىمىنسىز بەلگىلەنەدى. بۇل رەتتە، اناسى قايتىس بولعان، ونى ارەكەت ەتۋگە قابىلەتسىز دەپ تانىعان، ونىڭ تۇرعىلىقتى جەرىن انىقتاۋ مۇمكىن ەمەس جانە ول اتا- انا قۇقىقتارىنان ايىرىلعان جاعدايلاردا قامقورشىلىق جانە قورعانشىلىق ورگاندارىنىڭ كەلىسىمىن الۋ قاجەت.
جوعارعى سوتتىڭ سۋدياسى لاۋرا اعىبايەۆا «قىلمىستىق ىستەردى بۇيرىقتىق ءىس جۇرگىزۋ تارتىبىمەن قاراۋ تۋرالى» نورماتيۆتىك قاۋلىنىڭ جوباسىن تانىستىرا كەلە جاڭا ينستيتۋت - بۇيرىقتىق ءىس جۇرگىزۋدىڭ ماقساتى، ەرەكشەلىكتەرى تۋرالى ايتىپ بەردى. نورماتيۆتىك قاۋلى جوباسى سوتقا دەيىنگى ساتىدا جانە سوتتا ءىستى قاراۋ كەزىندە بۇيرىقتىق ءىس جۇرگىزۋدى قولدانۋ نورمالارىن تۇسىندىرۋدەن تۇرادى.
ل. اعىبايەۆا اتاپ وتكەندەي، نورماتيۆتىك قاۋلىنى قابىلداۋ بۇيرىقتىق ءىس جۇرگىزۋ سوت پراكتيكاسىنداعى داۋلى ماسەلەلەردى شەشۋگە، پراكتيكادا ءىس جۇرگىزۋدىڭ وسى ءتۇرىن كەڭ قولدانۋعا، پروتسەستى جەڭىلدەتۋگە مۇمكىندىك بەرىپ، سۋديالارعا، قۇقىق قورعاۋ ورگاندارىنىڭ قىزمەتكەرلەرىنە جانە بۇيرىقتىق ءىس جۇرگىزۋدى قولدانۋ بويىنشا ولاردىڭ قۇقىقتارىن ىسكە اسىرۋدا ازاماتتارعا پارمەندى جاردەم كورسەتەدى.
جوعارعى سوتتىڭ سۋدياسى اسقار سمايلوۆ «وزدەرىنىڭ قىزمەتىن زاڭنامانى ورەسكەل بۇزا وتىرىپ جۇزەگە اسىراتىن زاڭدى تۇلعالاردى تاراتۋداعى سوت تاجىريبەسى تۋرالى» نورماتيۆتىك قاۋلىعا تۇزەتۋلەر ەنگىزۋ جوباسىن ۇسىندى. قاۋلىنى ازىرلەۋ زاڭناماعا وزگەرىستەر ەنگىزۋگە بايلانىستى تۋىنداپ وتىر.