قازاق تىلىندەگى مۋلتفيلمدەر كينوتەاترلاردا نەگە ىڭعايلى ۋاقىتقا قويىلمايدى
جالپى، كينوتەاترلاردى قازاق تىلىندەگى تۋىندىلاردى كوبىرەك كورسەتۋگە مىندەتتەۋگە بولا ما؟ كينوتەاتر دالىزىندە ۇلتتىق كينوونىمدەردىڭ جارناماسى نەگە قويىلماي جاتىر؟ بۇل سۇراققا بۇگىن مادەنيەت جانە سپورت مينيسترلىگىنىڭ باسپا ءسوز ورتالىعىندا وتكەن بريفينگتە ش. ايمانوۆ اتىنداعى «قازاق فيلم» كينوستۋدياسىنىڭ باسپا ءسوز حاتشىسى اينۇر يسايەۆا جاۋاپ بەردى، دەپ حابارلايدى قازاقپارات ءتىلشىسى.
«جالپى، بۇل اڭگىمە كوپتەن بەرى ايتىلىپ كەلە جاتىر. اتالمىش ماسەلە ءبىزدىڭ ءبىر وسال تۇسىمىز دەسە دە بولادى. الايدا، پروكات ماسەلەسى، بەلگىلى ءبىر كينو سەانستارىنىڭ كوپ نەمەسە از بولۋى، قاي تىلدە نەمەسە قاي ۋاقىتتا كورسەتىلۋى - وكىنىشكە قاراي، كينوستۋدياعا تاۋەلدى ەمەس. اتالمىش ماسەلەنى مادەنيەت جانە سپورت مينيسترلىگى دە شەشە المايدى. ويتكەنى، كينوپروكات جۇيەسى تولىعىمەن جەكەمەنشىك كومپانيالاردىڭ قولىندا. سوندىقتان، ولارعا ءبىزدىڭ ءسوزىمىز وتپەيدى. ءبىز، ماسەلەن، «كۇلتەگىن» انيماتسياسى پروكاتقا شىعاردان ءبىر اي بۇرىن كينوتەاترلاردىڭ پروكات كەستەسىنە ەنگىزىپ، ولارمەن ارنايى كەلىسىمشارت جاسايمىز. ول اۋەلى العاشقى ەكى اپتاعا جاسالادى. ەگەر ول فيلمگە كوپ ادام باراتىن بولسا، كەلىسىمشارتتى ارى قاراي ۇزارتامىز»، - دەيدى اينۇر يسايەۆا.
ونىڭ ايتۋىنشا، شىنتۋايتىنا كەلگەندە كينوتەاترلار كەيبىر فيلمدەردى وتە ىڭعايسىز ۋاقىتقا قويادى.
«سونىمەن بىرگە، ولار قازاق تىلىندەگى تۋىندىلاردى وتە از قويادى. ءبىز «كينوپارك» جۇيەسىنىڭ پيار-ديرەكتورى ەرلان بۇحاربايەۆپەن حابارلاسىپ، وسى ماسەلەنى شەشۋ جونىندە تالاي كەلىسسوز جۇرگىزگەنبىز. ول كىسىلەردىڭ ايتۋىنشا، قازاق كورەرمەندەرى كينوتەاترعا بارمايدى. ءبىرىنشى قازاق جانە ورىس تىلىندەگى نۇسقاسىن قاتار قويادى ەكەن دە، سول كۇنى قاي تىلگە كورەرمەن كوپ كەلسە، سول تىلدەگى نۇسقاسىن كوپتەپ قويادى ەكەن. ءبىز ەرلان مىرزاعا ءوزىمىزدىڭ ءۋاجىمىزدى ايتىپ تۇسىندىرە المادىق. ايتپەسە، ءبىزدىڭ رەسمي الەۋمەتتىك جەلىدەگى پاراقشالارىمىزعا، تەلەفونمەن دە تالاي كىسىلەر حابارلاسىپ، رەنىشىن ايتىپ جاتىر. كورەرمەندەر جاقسى تۋىندىلار شىعىپ جاتقانىمەن، كينوتەاترلاردان تاپپاي جاتقانىن ايتادى» دەپ جاتىر»، - دەيدى ول.
اينۇر يسايەۆانىڭ ايتۋىنا قاراعاندا، بۇل ماسەلەنى الدا شىققالى جاتقان كينەماتوگرافيا تۋرالى زاڭ رەتتەۋى ءتيىس.
«ول زاڭ شىقسا، وسى ماسەلەنىڭ ءبارى تۇبەگەيلى جويىلادى دەپ ەسەپتەيمىز. ويتكەنى، ول زاڭنىڭ بىرنەشە بولىمىندە ۇلتتىق دەڭگەيدەگى تۋىندىلارعا جالپىۇلتتىق پروكات مىندەتتەلەدى. ونىڭ پرايم-تايمعا قويىلۋى دا مىندەتتەلەتىن بولادى. سوندىقتان، بۇل قازىرگى عانا ماسەلە. زاڭ شىقسا، ماسەلە شەشىلىپ، قازاق كورەرمەنى وزىنە قاجەتتى تۋىندىنى قازاق تىلىندە كورە الادى دەگەنگە سەنەمىن»، - دەيدى اينۇر يسايەۆا.
ءوز كەزەگىندە «قازاق فيلم» كينوستۋدياسىنىڭ انيماتسيالىق كينو شىعارماشىلىق بىرلەستىگىنىڭ باسشىسى اداي ءابدىلدا قازاقشا مۋلتفيلمدەر مەن فيلمدەرگە سۇرانىستى تەك كورەرمەننىڭ ەسەبىنەن ارتتىرۋعا بولاتىنىن ايتادى.
«الەۋمەتتىك جەلى بار. سۇراۋ دا، تالاپ ەتۋ دە كەرەك. مەن بىلەم، كورەرمەن قازاق ءتىلدى كونتەنتتى كورگىسى كەلەدى، دەمەك ونى تالاپ ەتۋ كەرەك. كينوپروكاتشىلار ءقازاقتىلدى كورەرمەننەن سۇرانىس جوق دەيدى. ءبىز بولساق، بار دەيمىز. تەك كورەرمەن كينوپروكاتشىلاردان تۋىندىلاردى قازاق تىلىندە تالاپ ەتۋى ءتيىس. Facebook-تەن ماعان كۇنىنە بەس حات كەلەدى. ءبارى دە قازاق تىلىندەگى انيماتسيانىڭ ىڭعايسىز ۋاقىتتا نەمەسە نەگىزىنەن ورىس تىلىندە كورسەتىلىپ جاتقانىن ايتادى. «كينەماتوگرافيا تۋرالى» زاڭدا دامىعان ەلدەردەگىدەي بۇل ماسەلە شەگەلەنۋى ءتيىس. ماسەلەن، قىتايدا شەتەلدىك فيلمدەردىڭ ۇلەسى بار-جوعى 30 پايىز عانا. قالعانى - وتاندىق ونىمدەر. ولار كوبىنەسە وتاندىق ونىمدەرگە باسىمدىق بەرەدى»، - دەيدى اداي ءابدىلدا.