ۇلتتىق بانك كۇمىستەن قۇيىلعان «كوكبورى» مونەتاسىن اينالىمعا شىعاردى
ۆەدومستۆو نومينالى 5000 جانە 500 تەڭگەلىك - كۇمىستەن، نومينالى 200 جانە 100 تەڭگەلىك - مەلحيور قوسپاسىنان «كوكبورى» كوللەكتسيالىق مونەتاسىن شىعاردى. ول «كوشپەندىلەردىڭ عيبادات جانۋارلارى - توتەمدەرى» مونەتالار سەرياسىنا جاتادى.
كوكبورى (كوك قاسقىرى) - ەجەلگى تۇرىكتەردىڭ نانىمىندا باستى توتەمدىك جانۋارلاردىڭ ءبىرى. رۋح - بابا، رۋح - قورعاۋشى، بۇكىل الەمدى باسقاراتىن ءتاڭىر. كوشپەندى حالىقتىڭ نانىم- سەنىمىندە قاسقىر كوك اسپانمەن بايلانىستى بارىنشا ماڭىزدى نىشانداردىڭ ءبىرى بولىپ ەسەپتەلەدى.
نومينالى 5000 جانە 500 تەڭگەلىك «كوكبورى» مونەتالارىنىڭ سيپاتتاماسى:
مونەتالار التىنداتۋ تەحنولوگياسىن قولدانا وتىرىپ كۇمىستەن جاسالعان جانە گاۋھار قوندىرماسى بار.
مونەتالاردىڭ بەت جانە سىرت جاقتارىنداعى بەينەلەرى بىردەي. مونەتالاردىڭ بەت جاعىندا (اۆەرسىندە) ۇلتتىق ويۋ- ورنەكتىڭ قورشاۋىندا سوعىلعان جىلى، نومينالى، قازاقستان تەڭگە سارايىنىڭ تاۋار بەلگىسى جانە مونەتا دايىندالعان مەتالدى، ونىڭ سىنامىن جانە ماسساسىن بىلدىرەتىن جازبا ورنالاسقان. مونەتانى اينالدىرا «قازاقستان رەسپۋبليكاسى • REPUBLIC OF KAZAKHSTAN» دەگەن جازبا بار.
مونەتالاردىڭ سىرت جاعىندا (ريەۆەرسىندە) گاۋھار قوندىرماسى بار قاسقىردىڭ باسىنىڭ ناتۋراليستىك جانە ترافارەتتىك بەينەسى بار كومپوزيتسيا جانە «كوكبورى» دەگەن جازبا ورنالاسقان. مونەتانى اينالدىرا ساقتاردىڭ جانۋارلار ستيلىندە دايىندالعان قاسقىردىڭ سۇلباسى بار جالپاق جيەك بەينەلەنگەن.
نومينالى 200 جانە 100 تەڭگەلىك «كوكبورى» مونەتالارىنىڭ سيپاتتاماسى:
مونەتالار مەلحيور قوسپاسىنان دايىندالعان. نومينالى 200 تەڭگەلىك مونەتادا التىنداتۋ تەحنولوگياسى قولدانىلعان.
مونەتالاردىڭ بەت جاعىندا (اۆەرسىندە) ۇلتتىق ويۋ- ورنەكتىڭ قورشاۋىندا سوعىلعان جىلى، نومينالى، قازاقستان تەڭگە سارايىنىڭ تاۋار بەلگىسى ورنالاسقان. مونەتانى اينالدىرا «قازاقستان رەسپۋبليكاسى • REPUBLIC OF KAZAKHSTAN» دەگەن جازبا بار.
مونەتالاردىڭ سىرت جاعىندا (ريەۆەرسىندە) قاسقىردىڭ باسىنىڭ ناتۋراليستىك جانە ترافارەتتىك بەينەسى بار كومپوزيتسيا جانە «كوكبورى» دەگەن جازبا ورنالاسقان. مونەتانى اينالدىرا ساقتاردىڭ جانۋارلار ستيلىندە ورىندالعان قاسقىردىڭ سۇلباسى بار جالپاق جيەك بەينەلەنگەن.
