ەرىكتىلەر شالعاي اۋىل بالالارىنا اعىلشىن ءتىلىن تەگىن ۇيرەتىپ ءجۇر
«Open English» جوباسى اياسىندا استانانىڭ شەتكى ايماقتارى سانالاتىن قوسشى، لەسوزاۆود، چۋگۋنكا ەلدىمەكەندەرىندە ورنالاسقان 15 مەكتەپ تاڭداپ الىندى.
«بۇل اۋماقتاردا اعىلشىن ءتىلىن ۇيرەنۋگە ۇلكەن قاجەتتىلىك بار، ال ورتالىقتا ورنالاسقان مەكتەپتەردە ونداي ۇلكەن مۇقتاجدىق جوق. اعىلشىن ءتىلىن ۇيرەتەتىن تەگىن كۋرستار اپتاسىنا ەكى رەت وتەدى. بۇگىنگى تاڭدا 45 وقىتۋشى- ۆولونتەر استاناداعى 180-گە جۋىق وقۋشىعا ءدارىس بەرىپ ءجۇر. 15 توپ جۇمىس ىستەپ تۇر، ءاربىر توپتا 12 وقۋشىدان بار»، - دەيدى دينارا ءسادۋاقاسوۆا.
«كۋرستان ءوتۋ ءۇشىن بالالاردىڭ اعىلشىن ءتىلى بويىنشا بازالىق ءبىلىمى بولۋى كەرەك. ءبىز نەگە الدىمىزعا ونداي ماقسات قويىپ وتىرمىز؟ ويتكەنى جوبا اياقتالعان سوڭ شاكىرتتەر IELTS سىناعىنان 6.0 ۇپاي جيناسا دەيمىز»، - دەيدى ول.
د. ءسادۋاقاسوۆانىڭ سوزىنە قاراعاندا، 2019 -جىلى اتالمىش جوبانىڭ اۋقىمىن كەڭەيتىپ، 7 مىڭنان استام وقۋشىنى وقىتۋ ويدا بار. 2019 -جىلدىڭ ەكىنشى جارتىسىندا اتالمىش جوبا قازاقستاننىڭ باسقا وڭىرلەرىندە دە جۇزەگە اسىرىلادى.
«وسى ۇلگىنى نەگىزگە الا وتىرىپ، كەلەشەكتە قازاق ءتىلىن دە وقىتۋدى كوزدەپ وتىرمىز. سونىمەن قاتار، لاتىن الىپبيىندە جازۋ كۋرستارىن ۇيىمداستىرعىمىز كەلەدى»، - دەپ اتاپ ءوتتى دينارا ءسادۋاقاسوۆا.