ا ق ش- تان ورالعان قانداسىمىز قازاقستانداعى سۇلۋ قىزداردىڭ كوپتىگىنە تاڭعالدى

  استانا. قازاقپارات - ا ق ش- تان ورالعان بويجەتكەن ايجان ەسبولاتوۆا قازاقستاندىق قىزداردىڭ سۇلۋلىعىنا قايران قالدى. بويجەتكەن ەكى ەلدىڭ قىزدارىن سالىستىرا ايتىپ بەردى.

بۇل تۋرالى «ۋرالسكايا نەدەليا» حابارلايدى.

«مەن ۇزاق جىلدار ا ق ش- تا بولىپ قايتتىم. ەلگە كەلگەن سوڭ قازاقستاندىق قىزداردىڭ سۇلۋلىعىن كورىپ، تاڭعالعانىم بار. تاڭەرتەڭ اۆتوبۋس كۇتىپ تۇرساڭ، بيىك وكشەلى اياق كيىم كيىپ، شاشىن كۇتىپ تاراپ، جىلتىراتىپ، ادەمى كيىنگەن قازاق قىزدارى تۇرادى. تاڭەرتەڭنەن ەرىنبەي ماكياج جاسايدى. ال، كەشكىسىن كلۋب نە كوڭىل كوتەرەتىن جەرلەردە ءتىپتى قۇلپىرىپ جۇرەدى. ءبىزدىڭ قىزدار ادەمىدەن بولەك، وزىنە اسقان كۇتىممەن قاراۋشىلار»، - دەيدى ايجان.

بويجەتكەن وتانداستارىن امەريكالىق قىزدارمەن سالىستىرىپ ءوتتى. شەتەل قىزدارىنىڭ كەمشىلىگى مەن ارتىقشىلىعىن اتادى.

«ال ەندى امەريكالىق ايەلدى الىپ كورەيىك. امەريكادا تاڭەرتەڭ ايالدامادان شاشى كەپپەگەن، ماكياج جاساماعان، اياعىنا كراسسوۆكا كيىپ، ريۋكزاك اسىنىپ العان قىزداردى كورەسىز. ولار ءوزىن كۇتۋ ەسەبىندە تەك تاڭەرتەڭ دۋشقا تۇسەدى. مانيكيۋر جاساپ قويۋى مۇمكىن. ءبىراق ونى دا ءبارى جاسامايدى. ءبىراق سوعان قاراماستان ەرلەرى جاقسى كورىپ، سىيلاپ تۇرادى. ويتكەنى ايەلدەرى وزىنە سەنىمدى. ءوز قادىرىن بىلەدى»، - دەيدى بويجەتكەن.

ايجاننىڭ ايتۋىنشا، قازاقستاندىق قىزدار ماكياج جاساۋعا، ۇيرەنۋگە، ءوزىن كۇتۋگە، ادەمى بولۋعا كوپ اقشا جۇمسايدى. ءتىپتى جارتى ايلىعىن جۇمساۋعا دايار. قازاقستاندا ماكياج جاساپ ۇيرەتۋ كۋرستارىنان كوپ نارسە جوق. ال، امەريكالىق قىزدار يوگامەن اينالىسادى، ماركەتينگ، ديزاين كۋرساتارىنا بارادى. ولاردىڭ تاڭداۋى باسقا.

«قازاقستاندا نەگە قىزدار بەتىنە قاس جاساپ، كىرپىك جابىستىرادى؟ جانە ول سۇلۋلىقتىڭ قۇنى قىمبات. نەگە ادەمىلىككە ەمەس، بىلىمگە قۇشتار بولمايدى؟ ويتكەنى قىزداردى بويجەتكەننەن باستاپ، ءبىر ازاماتتىڭ ەتەگىنەن ۇستاۋعا ۇيرەتەدى. 30 جاسقا جەتپەي تۇرمىس قۇرۋ كەرەك دەيدى. ايەلدى ادام ەمەس، ادامزات بولشەگى رەتىندە قارايدى. ايتپەسە نەگە ولاردى ۇرىپ- سوعىپ، كەز كەلگەن جەردە كۇش كورسەتەدى. قازاقستاندا ءۇش ءتىل مەڭگەرىپ، وقىعان قىز جان- جاقتى، ءبىلىمدى بولا تۇرا قاسىندا كۇيەۋى نە ەر ازاماتى جوق بولسا، باقىتسىز سانالادى. تۇرمىسقا شىقپاسا كارى سانايدى»، - دەيدى ەسبولاتوۆا.

ايتۋىنشا، امەريكالىق قىزدارعا قازاق قوعامىنداعىداي، «25 جاسىڭدا تۇرمىس قۇراسىڭ، جۇمىس ىستەيسىڭ، وتباسىڭنىڭ، بالالارىڭنىڭ، كۇيەۋىڭنىڭ كۇتىمەنە قارايسىڭ، قايىن جۇرتىڭا قىزمەت ەتەسىڭ. سويتە ءجۇرىپ وزىڭە كۇتىم جاساۋىڭ كەرەك. بالا تۋۋىڭ كەرەك. ءۇي شارۋاسىمەن اينالىسۋىڭ كەرەك. كەيىن كۇيەۋىڭ ەكىنشى ايەل الام دەۋى دە مۇمكىن» دەسەڭ، باسىن الا قاشار ەدى. ويتكەنى ولار تاۋەلسىز. ەلدىڭ ءسوزى ءۇشىن ەمەس، ءوزى قاشان تۇرمىسقا شىققىسى كەلەدى، سول كەزدە شىعادى. ءوز قادىرىن بىلەدى. ولار بۇعان ءبىر كۇندە كەلگەن جوق. ءوز تەڭدىگى ءۇشىن قانشا جىل كۇرەستى. اقىرى قول جەتكىزدى.

ايجان ەسبولاتوۆا قازاقستاندىق قىزداردىڭ دا امەريكالىق ايەلدەر سەكىلدى ەركىن بولۋىن قالايدى. سول كۇنگە جەتەرمىز دەپ سەنەدى.

Stan.kz