قانتتان باس تارتۋ نۇسقاۋلىعى

استانا. قازاقپارات - ءتاتتىقۇمارلىق دەنساۋلىققا كەرى اسەرىن تيگىزەدى. سوعان قاراماستان، قانتتان باس تارتا المايتىندار بار. سول سەبەپتى، ءبىز بۇگىن سىزگە كومەكتەسەتىن نۇسقاۋلىقتى ۇسىنامىز.

ءتاتتى، ۇندى جانە قۋىرىلعان تاعامدار تاۋەلدىلىكتى وياتادى. ادام قانتقا فيزيكالىق تۇرعىدان - تاعامنىڭ تابيعي ءدامى جاعىمسىز بولسا، پسيحولوگيالىق - كۇيزەلىسپەن كۇرەسۋدە كومەكتەسەدى دەگەن ويمەن ۇيرەنىپ الادى. دەگەنمەن، قانتتى ءجيى قولدانۋ تەك سىمباتىڭىزعا اسەر ەتىپ قانا قويماي، زات الماسۋدىڭ قالىپتى جۇمىسىن بۇزىپ، ادام اعزاسىندا كۇيزەلىستىڭ تۋىنداۋىنا الىپ كەلەدى. ءبىر جاقسىسى، ىشىمدىك پەن نيكوتينگە قاراعاندا تاتتىدەن باس تارتۋ الدقايدا جەڭىل.

نەگە ءتاتتى ادامدى سەمىرتەدى؟

قانتتىڭ سەمىزدىكتى تۋدىرۋ سەبەبى ونىڭ كالورياسىنىڭ جوعارىلىعىمەن عانا بايلانىستى ەمەس. ءبىر قاسىق قانت سالىنعان شاي نەبارى 20-25 كيلوكالورياعا يە. دەگەنمەن، مۇنداي شاي ادامنىڭ قارنىن اشىرىپ، ءسىزدى قايتا- قايتا تاماقتانۋعا ماجبۇرلەيدى. الدىمەن قانت قانداعى گليۋكوزا مولشەرىن كوتەرەدى دە، جارتى ساعاتتان سوڭ ونىڭ مولشەرى بىردەن ازايادى. ەگەر سول ساتتە قارنىڭىزدى ءتاتتى ارقىلى قايتا جۇرەك جالعاپ، تويدىرۋدى ويلاساڭىز، باستاپقى ءۇردىس قايتالانىپ، قارنىڭىز ودان سايىن اشا تۇسەدى. قانداعى گليۋكوزانىڭ ءجيى اۋىتقۋى زات الماسۋدى بۇزىپ، اعزانىڭ ينسۋلينگە سەزىمتالدىعىن ازايتادى. وسىلايشا، باستى ماسەلە قانت ديابەتى تۋىنداۋ مۇمكىندىگى ارتادى.

 21 كۇندە قالاي قانتتان باس تارتۋعا بولادى؟ قانتتان باس تارتۋ - بىرتە- بىرتە ىسكە اساتىن ءۇردىس. تاۋەلدىلىكتەن ايىرىلۋ ءۇشىن سىزگە 3-4 اپتا كەرەك. وسىدان سوڭ، تاتتىگە قۇمارتپاي، ورنىمەن قولدانۋدى ۇيرەنەسىز:

 • العاشقى اپتا: گازدى سۋسىندار مەن شىرىنداردان باس تارتىڭىز. شايىڭىزعا سالاتىن قانت مولشەرىن ازايتىڭىز نەمەسە بمۇلدە سالماڭىز. ونىڭ ورنىنا ءبىر تامشى بالدى قولدانىپ كورىڭىز.

 • ەكىنشى اپتا: ۇيگە ساتىپ الاتىن تاتتىلەردەن باس تارتىڭىز. ارتىق شوكولاد، ءبالىش پەن تورت بولىكتەرىن ساتىپ الماڭىز. تاتتىلەردى كوزىڭىزدىڭ كورۋ ايماعىندا ساقتاماڭىز.

 • ءۇشىنشى اپتا: «جاسىرىن قانتتاردى» اجىراتىپ ۇيرەنىڭىز. ءونىم ساتىپ الاردا، سىرتقى قوراپقا ءمان بەرىپ قاراڭىز، قانت الماستىرۋشىلارمەن تانىسىڭىز. «قانتسىز» دەگەن جاڭعىرىق جارناماعا الدانىپ قالماڭىز. فرۋكتوزا، گليۋكوزا شىرىنى، مالتودەكسين، دەكستروزا، سۋكروزا، اگاۆا مەن بال - قانتتىڭ تۇرلەرى.

قانتتان باس تارتۋدىڭ پايداسى مەن سالدارى: قانتتان باس تارتا المايتىندار ادامنىڭ ميىنا قانت كەرەك دەگەن جالعان تۇجىرىمعا سەنەدى. ال، شىندىعىندا ادامنىڭ ميى جۇمىس جاساۋ ءۇشىن قانتتىڭ قاجەتى جوق. اعزا كۇردەلى كومىرسۋلاردان گليۋكوزانى ءونىدىرىپ الۋعا قابىلەتتى. قانتتان باس تارتقانىڭىزدان ەشقانداي زيان كورمەيسىز. ەسەسىنە، ءوزىڭىزدى جاقسى سەزىنىپ، ارتىق سالماقتان ارىلاسىز. باستى پايداسى اراعا اپتا سالىپ قانداعى گليۋكوزانىڭ تومەندەۋىنەن تۋاتىن «جالعان» اشتىقتى شىنايى اشتىق سەزىمەنەن اجىراتا باستايسىز.

 قانتتان تولىق باس تارتۋ دۇرىس پا؟ قانتتان تولىق باس تارتقاننان گورى، ونى اندا- ساندا سانالى تۇردە قولدانىپ ۇيرەنگەن ءجون. قانتتى كۇيزەلىسكە قارسى قۇرال رەتىندە ەمەس، ادام اعزاسىنا زيانىن تيگىزەتىن «ۋ» رەتىندە قابىلداڭىز. كىشكەنە ءبالىش پەن ءبىر شىنى قانتتى كوفە ىشكەننىڭ زيانى جوق ەكەنى انىق، ءبىراق گازدى سۋسىن مەن تورت، قالا بەردى ءبىر قوراپ شوكولاد جەسەڭىز اعزاڭىزدى ءولتىرىپ الاسىز. ەستە ساقتاڭىز، اعزاعا قانتتىڭ ءوزى عانا ەمەس، ونى ۇزدىكسىز جانە ولشەمسىز قولدانۋ زيان.

Massaget.kz