قىرعىز تۇركولوگى: قازاقستان پرەزيدەنتى بابالار وركەنيەتىنە لايىق بولۋعا شاقىرىپ وتىر

 استانا. قازاقپارات - قىرعىزستاندىق بەلگىلى تۇركولوگ، حالىقارالىق تۇركى اكادەمياسىنىڭ عالىمى قادىرالى قوڭقابايەۆ ق ر پرەزيدەنتى نۇرسۇلتان نازاربايەۆتىڭ «ۇلى دالانىڭ جەتى قىرى» اتتى ماقالاسىنا قاتىستى پىكىرىن ءبىلدىردى، دەپ حابارلايدى قازاقپارات ءتىلشىسى.

«تۇركولوگ دەگەن ءبىر توپ عالىم بار. سول عالىمداردىڭ ارمانى ورىندالدى دەپ قۋانىپ جاتىرمىز. سەبەبى، تۇركى ەلدەرىنىڭ 2-3 مىڭ جىلدىق تاريحىنا، تۇركى ەلدەرىنىڭ تۇپكى مادەنيەتى مەن ەتنوگەنەزىنە، ولاردىڭ جاراتقان وركەنيەتتەرىنە بىردە- ءبىر مەملەكەت باسشىسى مۇنداي قامقورلىق كورسەتكەن ەمەس. بۇل - ەڭ باستى شارۋا. ەكىنشىدەن، تۇركى ەلدەرىنىڭ وركەنيەتى - تاريحتىڭ جول- جونەكەي قۇبىلىسى ەمەس. مىسالى ءۇشىن ەلباسىنىڭ ايتىپ وتىرعان ات مادەنيەتى، اڭ ءستيلى، ەجەلگى مەتاللۋرگيا - ادامزاتتى تاڭداي قاقتىرارلىق مادەنيەتتەر. كەرەك دەسەڭىز، ەۋروپا ەلدەرى تەمىرگە التىن جانە كۇمىس جالاتۋدى 16-17 عاسىردا عانا ۇيرەنگەن. ال اتا- بابالىرىمىز تەمىر مەن قولانىڭ ۇستىنە التىن مەن كۇمىستى جالاتۋدى ءبىزدىڭ داۋىرىمىزگە دەيىنگى ەكىنشى عاسىردا مەڭگەرىپ قويعان» ، - دەيدى قادىرالى قوڭقابايەۆ.

تانىمال تۇركولوگتىڭ ايتۋىنا قاراعاندا، قازىرگى تۋۆا رەسپۋبليكاسىنىڭ قىزىلشارىنداعى قورعاننان جەتى جارىم كەلىلىك التىن تابىلعان.

«ونداعى التىننان تاققان حانشانىڭ مونشاعى ءۇش جارىم كەلى كورسەتكەن. ول جەردەن التىننان جاسالعان بايتەرەك تابىلعان. ەندەشە ءبىز اتالارىمىز جاراتقان سول مادەنيەتتىڭ بارلىعىن جانداندىرۋىمىز كەرەك. «ارحيۆ - 2025» ، مەنىڭشە، ەڭ كەرەك باعدارلاما. تۇركى ەلدەرىنىڭ مادەنيەتتەرىن ارحيۆتەۋ، وقۋلىق ورتالىقتارىن قۇرۋ، مۋزەي اشۋ - تۇركى ەلدەرىنىڭ كەلەشەگىنىڭ قامى. ەگەر مەملەكەت تۇركى ەلدەرىنىڭ مۇراسىن ويلاماسا، وندا ول مادەنيەتتىڭ ەشكىمگە دە كەرەگى جوق. وقىمىستىلار ارمانىن ايتىپ، قيالداپ جۇرە بەرەر ەدى. وتكەنگە ءۇڭىلۋ، سارالاۋ، ساباق الۋ - قازاقستاننىڭ قۋاتتى مەملەكەت بولعانىنىڭ بەلگىسى» ، - دەپ ءتۇيدى قادىرالى قوڭقابايەۆ.

 ايتا كەتۋ كەرەك، بۇگىن ق ر پرەزيدەنتى نۇرسۇلتان نازاربايەۆ «ۇلى دالانىڭ جەتى قىرى» اتتى ماقالاسىن جاريالاعان بولاتىن.