ەۋروپاعا رۋحاني ازىقتى ەندى ءبىز بەرە باستايمىز - ابايتانۋشى عالىم
فيلولوگيا عىلىمدارىنىڭ دوكتورى، پروفەسسور م. مىرزاحمەتوۆتىڭ ايتۋىنشا، پرەزيدەنت ماقالاسى دەر كەزىندە جاريالانىپ وتىر.
«تاريحي سانانى جاڭعىرتۋ، جۇرتقا جاريالاۋ - ۇلكەن ەرلىك. بۇل ماقالا كوپ ادامعا وي سالادى. تاريحتى، ۇلى دالانىڭ تاريحىن ءبىز ءالى اشا العانىمىز جوق. ءبىزدىڭ ۇلى دالامىزدا نەبىر ۇلى ادامدار وتكەن. سونىڭ كوبىن ءبىز بىلە بەرمەيمىز. تاياۋ ارادا ءبىز شىمكەنتتە «اتتيلا ي گۋنسكايا وردا» دەگەن كىتاپ شىعاردىق. اتتيلا V عاسىردا ارتتا قالعان، ساياسي ۇعىمى ءالى تەرەڭ ەرمەس، مەملەكەت تۇرلەرىن بىلمەيتىن بۇكىل ەۋروپانى، حالىقتى جاڭعىرتىپ سولارعا يدەيا بەرگەن، تىرىلتكەن ادامداردىڭ ءبىرى بولدى. بۇل تۋرالى بولگار تاريحشىسى ەرتەرەكتە جازعان. مۇنداي عىلىمي دۇنيەلەر اشىلىپ كەتكەندە نە بولادى؟ 842 -جىلى بولگار تىلىندە «شاڭ قىزى» دەگەن داستان شىققان. ورىس تىلىنە اۋدارىلعان ەكەن. كولەمى وتە ۇلكەن. ءبىزدىڭ بۇكىل دۇنيەتانىمىمىز سوندا تۇر. تۇرىكتەردىڭ قايدان شىققانى، قالاي قالىپتاسقانى بارلىعى جازىلعان. ەلباسىنىڭ بۇگىنگى ماقالاسى تاريحي سانانى كوتەرۋدىڭ، حالىققا جەتكىزۋدىڭ كەرەمەت مەتودولوگياسى رەتىندە جازىلعان»، - دەدى مەكەمتاس مىرزاحمەتوۆ.
عالىمنىڭ ايتۋىنشا، ەندىگى كەزەكتە قازاق تاريحشىلارى مەن زەرتتەۋشىلەر ەۋروپاسەنتريستىك باعىتتاعى ىزدەنىستەن باس تارتۋى ءتيىس.
«ءبىز كوپ جاعدايدا ەۋروپاعا ەلىكتەيمىز. ەۋروپا رۋحاني ازىق بەرۋدەن قالعان. ەندى ولارعا ونى ءبىز بەرە باستايمىز. ياساۋيدىڭ ءىلىمى، ابايدىڭ «تولىق ادام» ءىلىمى، شاكارىمنىڭ «ار ءىلىمى» ولاردىڭ قولىندا جوق. وسىنى جازىپ تەز ارادا حالىققا بەرۋىمىز كەرەك. جاقىندا ابايدىڭ «تولىق ادام» ءىلىمى تۋرالى مونوگرافيا جازۋدى اياقتادىم. سوندا ۇققانىم، ادامدى جامان قىلىقتان تازالاۋدىڭ قۇرالى بىزدە ەكەن. سوندىقتان، وسى باي تاريحىمىزبەن، مۇرامىزبەن نەگە ماقتانباسقا؟!»، - دەدى ول.
ەسكە سالايىق، بۇگىن ق ر پرەزيدەنتى نۇرسۇلتان نازاربايەۆ «ۇلى دالانىڭ جەتى قىرى» اتتى ماقالاسىن جاريالاعان بولاتىن.