نۇرسۇلتان نازاربايەۆ ورتالىق ازيا ەلدەرىنىڭ قارىم- قاتىناسىنا باعا بەردى
بۇل تۋرالى بۇگىن اقوردادا قازاقستاندا تىركەلگەن ديپلوماتيالىق ميسسيالار مەن حالىقارالىق ۇيىمداردىڭ باسشىلارىمەن كەزدەسۋ بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«بيىلعى جىلدىڭ ناۋرىز ايىندا استانادا وتكەن ورتالىق ازيا مەملەكەتتەرى باسشىلارىنىڭ ءبىرىنشى كونسۋلتاتيۆتىك كەزدەسۋىنەن كەيىن ءوڭىرارالىق ىقپالداستىق ەداۋىر جانداندى. ايماقتاعى ەلدەردىڭ بارلىق پرەزيدەنتتەرى قىسقا مەرزىم ىشىندە ءوزارا ساپارلار الماسىپ، كەزدەسۋلەر وتكىزدى. قازىرگى تاڭدا مەملەكەتتەر اراسىندا ەكىجاقتى ساۋدا ىسىنە قاتىستى كەدەرگىلەردىڭ ءبارى جويىلدى. وزبەكستان مەملەكەتى كەيىنگى كەزدە ءوز كورشىلەرىمەن كوپتەن بەرى رەتتەلمەي كەلگەن شەكارا ماسەلەسىن شەشتى. شيەلەنىسىپ كەتكەن جاعداي تاجىكستانمەن بولعان. ول ماسەلە شەشىلدى، قىرعىزستانمەن اراداعى ماسەلە شەشىلدى. ولاردىڭ شەشىلمەي كەلە جاتقان شەكارا ماسەلەسى دە شەشىمىن تاۋىپ، قارىم- قاتىناس جانداندى. جالپى ورتالىق ازياداعى ءال- احۋال تۇزەلىپ، ساۋدا- ساتتىق جىلدان- جىلعا ءوسىپ كەلەدى» ، - دەپ اتاپ ءوتتى ەلباسى.
مەملەكە باسشىسىنىڭ ايتۋىنشا، كورشى ەلدەر اراسىندا سەنىم ارتتى، ساۋدا كولەمى كوبەيدى. قارىم- قاتىناستىڭ بارلىعى جاقساردى. كولىك قاتىناسى وڭتايلانىپ، جاڭا اۋە، تەمىر جول باعىتتارى اشىلدى. جۇيەلى تۇردە بيزنەس جانە ءوڭىرارالىق فورۋمدار وتكىزىلىپ، بىرىككەن ساۋدا ۇيلەرى مەن جاڭا ءوندىرىس ورىندارى ىسكە قوسىلۋدا.
«ءبىر جىلدىڭ ىشىندە عانا قازاقستان مەن وزبەكستان اراسىنداعى ساۋدا اۋقىمى 2 ەسە كوبەيىپ، 3 ميلليارد دوللارعا جەتتى. جاقىن ارادا 5 ميلليارد دوللارعا جەتكىزەمىز دەگەن ماقسات قويىپ وتىرمىز» ، - دەدى نۇرسۇلتان نازاربايەۆ.
ەلباسى ورتالىق ازيا ەلدەرى اراسىندا شەكارا ماسەلەسىنە قاتىستى دا جۇمىستار بەلسەندى جۇرگىزىلگەنىن ايتتى.
«اتاپ ايتقاندا، وتكەن جىلى قازاقستان تۇرىكمەنستانمەن، قىرعىزستانمەن مەملەكەتتىك شەكارانى دەماركاتسيالاۋ جونىندەگى كەلىسىمگە قول قويىپ، وسى ەلدەرمەن اراداعى شەكارانى راسىمدەۋ جۇمىستارىن تۇگەلدەي اياقتايتىن بولادى. سونداي- اق قازاقستاننىڭ توڭىرەگىندەگى بارلىق شەكارالار بارلىق قۇقىعى جونىنەن ءوز شەشىمىن تاۋىپ وتىر. سونىمەن قاتار 2017 -جىلى قازاقستان، تۇرىكمەنستان، وزبەكستان شەكارالارىنىڭ ءتۇيىسۋ نۇكتەسى جونىندەگى دە شارت جاسالدى. جاقىندا ءبىز قۇجاتتى راتيفيكاتسيالادىق. سونىمەن قاتار استانادا كەزدەسۋدىڭ قورىتىندىسى بويىنشا ورتالىق ازيا مەملەكەتتەرى باسشىلارىنىڭ كەزدەسۋىن تۇراقتى تۇردە وتكىزۋ تۋرالى شەشىم قابىلداندى. ەندىگى جىلى ءساۋىر ايىندا تاشكەنتتە بۇل كەزدەسۋ وتەدى. سودان كەيىن جىل سايىن كەزدەسۋ بولىپ تۇراتىنىنا كەلىستىك» ، - دەدى ق ر پرەزيدەنتى.