تەگىم قازاق دەگەن رەسەيلىك تانىمال اكتريسا قاراعاندىدان تۋعان اتاسىن ىزدەپ ءجۇر
بولجام بويىنشا، اكتريسا تۋعان اتاسىن ىزدەۋدە. اكتريسا ونىڭ ەسىمىن، قاراعاندىلىق جانە قازاق ەكەنىن عانا بىلەدى ەكەن، دەپ حابارلايدى «نوۆىي ۆەستنيك» باسىلىمىنا سىلتەمە جاساپ Stan.kz.
وتكەن عاسىردىڭ 50-جىلدارىندا قاراعاندىلىق جاۋىنگەر بەلورۋستىڭ بوريسوۆ قالاسىندا اسكەري بورىشىن وتەگەن. ول بەلگىسىز سەبەپتەرمەن 1954-جىلى جوعالىپ كەتىپتى. سودان بەرى ودان ەشقانداي حابار بولماعان. اكتريسانىڭ بولجامىنشا، قاراعاندىلىق سارباز اسكەردە بورىشىن وتەپ جۇرگەن كەزدە بالاسى (رەد. يانينانىڭ اكەسى) دۇنيەگە كەلەتىنىن بىلمەگەن.
«تۋىستارىمىزدىڭ اڭگىمەلەۋىنشە، ساربازدىڭ ەسىمى - ءالىمباي شاحمۇحامەدوۆ نەمەسە ءالىمباي شاحمۇحامبەتوۆ. ءبىزدىڭ ەكى نۇسقامىز بار»، - دەيدى مەلەحوۆا.
اكتريسانىڭ اكەسىنە تۋۋ تۋرالى كۋالىك بەرىلگەننەن كەيىن، قۇجاتتاعى اكەسىنىڭ اتى جازىلماپتى. الايدا يانينانىڭ اجەسى ۇلىنىڭ تەگى بولۋى ءۇشىن، ءوزى باسقا ەسىم جازدىرىپتى. ۇيالعاننان با، الدە «ءالىمباي ۇلى» تەگىن جاسىرىپ قالعىسى كەلدى مە، ايتەۋىر ايەل ۇلىنا «ولەگوۆيچ» تەگىن بەرگەن.
«مەنىڭ ەسەبىم بويىنشا، اتام قازىر 90 جاستا. ول ءالى ءتىرى بولسا جاقسى بولار ەدى. ول 1955-جىلى اسكەردەن قاراعاندىعا قايتىپ كەلدى مە نەمەسە باسقا جەردە قالىپ قويدى ما، بىلمەيمىن. اجەم ەكەۋىنىڭ اراسىندا ۇلكەن ماحاببات بولعان. مۇنان كەيىن ەشكىممەن كەزدەسپەگەن. ول تۇرمىسقا شىقپاي، ۇلىن جالعىز ءوزى ءوسىردى. ول ادالدىعىن ساقتاعان بولار. ناقتى نە بولعانىن جانە ساربازدىڭ نەلىكتەن جوعالىپ كەتكەنىن ايتۋ قيىن»، - دەيدى اكتريسا.
يانينا قاراعاندىعا كەلگەننەن كەيىن بىردەن ا ح ا ت- قا بارعان. ونداعىلار اكتريسانى ءتۇسىنىپ، ارحيۆتى تەكسەردى. تەكسەرىستەن كەيىن اكتريسانىڭ اتاسى مەن اكەسىنىڭ اراسىنان بايلانىس تابىلدى. الايدا مۇنان كەيىن اكتريسانى ادىلەت ورگانى مەن اسكەري كوميسسارياتقا جىبەردى.
«مەنىڭ شىققان تەگىم - قازاق. مەن وعان سەنەمىن. اكەمنىڭ كوزى قوڭىر جانە قارا-تورىلاۋ. مەندە دە سولاي. جانە ءالىمباي شاحمۇحامبەتوۆ دەگەن ەسىمدى ويدان قۇراستىرۋ دا... مەن اتامدى تاپقىم كەلەدى. اكەم دە ونى كورگىسى كەلەدى»، - دەيدى اكتريسا.