ەلباسى بارلىق تاريحشىلارعا ۇندەۋ جاساپ وتىر - تۇركىتانۋشى-عالىم

استانا. قازاقپارات - بۇگىن ەلباسى نۇرسۇلتان نازاربايەۆتىڭ «ۇلى دالانىڭ جەتى قىرى» اتتى ماقالاسى جاريالاندى.

ماقالادا تۇركى وركەنيەتىن دامىتۋعا قاتىستى ءبىرقاتار ماقسات-مىندەتتەر بەلگىلەندى، دەپ حابارلايدى قازاقپارات ءتىلشىسى.

تۇركى تانۋشى ءناپىل بازىلحاننىڭ ايتۋىنشا، اتالعان ماقالانىڭ ستراتەگيالىق ماڭىزى زور. سەبەبى وندا ءبىزدىڭ وتكەنىمىز بەن بولاشاعىمىز قامتىلىپ وتىر.

«بۇل - باعدارلامالىق ماقالا. پرەزيدەنت كوشپەلىلەر وركەنيەتىنىڭ نەگىزگى بەسىگى التاي ەكەنىن، تاڭعاجايىپ اڭ ءستيلىن، ميفولوگيانى - ءبارىن انىق كورسەتتى. مەملەكەت باسشىسى ءتول تاريحىن بىلەتىن، باعالايتىن جانە ماقتان ەتەتىن ۇرپاقتىڭ بولاشاعى زور بولادى دەيدى. سوندىقتان بۇل - بۇگىنگى بولمىسىمىزدى ساراپتاپ، بولاشاعىمىزدى باعامداۋعا ارنالعان ماقالا. ونىڭ ستراتەگيالىق ماڭىزى زور»، - دەدى ن. بازىلحان قازاقپارات تىلشىسىنە بەرگەن سۇحباتىندا.

عالىمنىڭ سوزىنە قاراعاندا، پرەزيدەنت «ۇلى دالانىڭ جەتى قىرى» ماقالاسى ارقىلى بارلىق تاريحشىلارعا ۇندەۋ جاساپ وتىر. سونىڭ ىشىندە تۇركىتانۋشىلارعا دا اۋقىمدى شارالاردى قولعا الۋ قاجەت.

«ماسەلەن، «تۇركى وركەنيەتى: ءتۇپ تامىرىنان قازىرگى زامانعا دەيىن» اتتى جوبا تۋرالى جازىلدى. نەگىزى، تۇركى الەمى - بۇل ۇلكەن الەم. ول ەۋرازيانى تولىعىمەن قامتيدى. وعان قاتىستى تاريحتىڭ ءبىراز قىرلارى ءالى دە تۇپكىلىكتى زەرتتەلمەگەن. سوندىقتان پرەزيدەنت تۇركى حالىقتارىنىڭ تاريحىن كەشەندى تۇردە قاراۋعا ۇندەۋ تاستاپ وتىر. سەبەبى ونىڭ ىشىندە ارحەولوگيا، ەتنوگرافيا، مادەنيەت پەن ونەر، فولكلور جانە تاعى باسقا سالالار بار. وسى جۇمىسقا تۇركى الەمىن زەرتتەپ جۇرگەن وتاندىق بولسىن، شەتەلدىك بولسىن، بارلىق عالىمدار اتسالىسۋى قاجەت دەپ ويلايمىز. بۇدان بولەك، مەملەكەت باسشىسى تۇركى حالىقتارىنا ورتاق تۋىندىلاردىڭ ءبىرىڭعاي ونلاين كىتاپحاناسىن اشۋدى ۇسىندى. بۇل - وتە ورىندى يدەيا. سەبەبى ءبىز زامان تالابىنا ساي دامۋعا ءتيىسپىز. قازىرگى تەحنولوگيالاردى جان- جاقتى قولدانعان ءجون. سوندا تۇركى الەمىنە قاتىستى تاريحي دەرەكتەردى ونلاين كىتاپحانا ارقىلى وقۋعا مۇمكىندىك تۋادى»، - دەپ اتاپ كورسەتتى ن. بازىلحان.

ايتا كەتەيىك، ءوز ماقالاسىندا پرەزيدەنت قازاقستاننىڭ كۇللى تۇركى حالىقتارىنىڭ قاسيەتتى «قارا شاڭىراعى» ەكەنىن، سونداي-اق، قازاقتىڭ سايىن دالاسىنان الەمنىڭ ءار تۇكپىرىنە تاراعان تۇركى تەكتەس تايپالار مەن حالىقتاردىڭ باسقا ەلدەر مەن وڭىرلەردىڭ تاريحي ۇدەرىستەرىنە ەلەۋلى ۇلەس قوسقانىن ەرەكشە اتاپ ءوتتى.

«وسىعان بايلانىستى، «تۇركى وركەنيەتى: ءتۇپ تامىرىنان قازىرگى زامانعا دەيىن» اتتى جوبانى قولعا الۋ قاجەت. بۇل جوبا اياسىندا 2019-جىلى استانادا تۇركولوگتاردىڭ دۇنيەجۇزىلىك كونگرەسىن جانە ءارتۇرلى ەلدەر مۋزەيلەرىنىڭ ەكسپوزيتسيالارىنا ەجەلگى تۇركى جادىگەرلەرى قويىلاتىن تۇركى حالىقتارىنىڭ مادەني كۇندەرىن ۇيىمداستىرۋ كەرەك. سونداي-اق، ۆيكيپەديانىڭ ۇلگىسىندە قازاقستاننىڭ مودەراتورلىعىمەن تۇركى حالىقتارىنا ورتاق تۋىندىلاردىڭ ءبىرىڭعاي ونلاين كىتاپحاناسىن اشۋ دا ماڭىزدى. سونىمەن قاتار، جاڭا وبلىس ورتالىعى رەتىندە تۇركىستاندى دامىتۋ بارىسىندا ونىڭ حالىقارالىق ارەناداعى بەدەلىن جۇيەلى تۇردە ارتتىرۋ قاجەت. قازاقستاننىڭ ەجەلگى استاناسى حالقىمىزدىڭ رۋحاني ورتالىعى عانا ەمەس، سونداي-اق، بۇكىل تۇركى الەمى ءۇشىن كيەلى ورىن بولىپ سانالادى»، - دەلىنگەن ماقالادا.

قازاقپارات ماقالانىڭ تولىق ءماتىنىن جاريالاعان بولاتىن.